Premtimet e shumta të dhëna nga ministri i Jashtëm
i Qeverisë së Kosovës, Enver Hoxhaj, se brenda pak kohësh Kosovës do t’i vinë disa
njohje, e të cilat nuk kanë ndodhur ende, nuk kanë zgjuar vetëm kritikat e
opozitës. Në një anketë të zhvilluar nga Agjencia e Lajmeve Kosovapress, me
politikën e jashtme të Kosovës të pakënaqur janë shprehur edhe qytetarët, ku 66
për qind e pjesëmarrësve në anketë mendojnë se politika e jashtme e Kosovës
është e dështuar. Kurse për ish-ministrin Skënder Hyseni, ironia më e madhe që
ka bërë Ministria e Jashtme është prezantimi në uebfaqën e saj zyrtare të
shteteve që nuk e kanë njohur Kosovën.
Njëra nga
fushat prioritare, krahas asaj të zhvillimit ekonomik të vendit, në Qeverinë e
Kosovës është diplomacia e jashtme, dhe kjo kuptohet edhe nëse shikojmë numrin
e personave që janë të angazhuar në këtë resor, ku përveç ministrit, Enver
Hoxhaj dhe zëvendësministrave të tij, Qeveria e Kosovës ka edhe dy
zëvendëskryeministra që veprimtaria e tyre ka të bëjë me politikën e jashtme,
Behgjet Pacollin dhe Edita Tahirin. Edhe pse ka një numër të madh te emrave në
diplomacinë e jashtme kosovare, kjo shumë herë ka reflektuar me deklarata
kundërthënëse, se kush është meritori për sjelljen e një njohje, apo në
“vrapimin” për të njoftuar se Kosova do njihet nga një vend, e në disa raste
ato deklarime nuk kanë dal të sakta, por qëllimi ishte marrja e “flamurit”,
ndërsa nuk kanë munguar as akuzat e kundër-akuzat.
Të gjitha
këtu nuk kanë kaluar pa u vërejtur nga qytetarët. Në anketën e zhvilluar nga
Agjencia e Lajmeve Kosovapress me pyetjen “Si e vlerësoni politikën e jashtme
të Kosovës?”, shumica e respodentëve kanë shprehur mendimin që politika e
jashtme e Kosovës është e dështuar. Nga 1069 persona sa kanë votuar, 709 apo 66
për qind e respodentëve e kanë vlerësuar të dështuar, 302 apo 28 % e kanë
vlerësuar politikën e jashtme të suksesshme dhe 59 respondentë apo 6 për qind
janë shprehur që nuk e dinë.
Shumë herë
premtimet e shefit të diplomacisë kosovare, Enver Hoxhaj, kanë dal të pasakta,
në njohjen e Republikës së Kosovës. Më 28 maj ai kishte dhënë një deklaratë, ku
thoshte se brenda pak ditësh do të vijnë tri njohje për Republikën e Kosovës,
por që vetëm një njohje ka ardhur që nga ajo kohë, nga Republika e Çadit,
ndërsa dy të tjera ende nuk kanë ardhur edhe pse ka kaluar më shumë se një
muaj.
Por kryetari
i Komisionit për Politik të Jashtme, Albin Kurti thotë se politikës së jashtme
të Kosovës i mungon thellësia intelektuale dhe largpamësia strategjike.
“Mendoj se
Qeveria e Kosovës ka tepër shumë politikë të jashtme, e cila është më shumë
formale se sa përmbajtjesore. Kjo vërehet prej resorëve të shumta që i kanë
caktuar për politikë të jashtme, të cilat nuk duken që janë të koordinuara
mirë, e deri te fakti që nuk ka as thellësi intelektuale dhe as largpamësi
strategjike, në bërjet e kësaj politike, por më shumë takime, komunikime, ku
dominojnë ceremonitë simbolet, e kështu me radhë”, ka theksuar Kurti për
Kosovapress.
Për më tepër
ai ka shtuar se nuk është problemi që ka pak politikë të jashtme, por ka
inflacion të politikës së jashtme, që reflektohet në formë, e të cilës sipas
tij i mungon substanca e qëndrueshme.
Kurti ka
thënë se ka një lloj dështimi sa i përket politikës së jashtme edhe në fushën e
njohjeve ndërkombëtare, për shkak se siç ka thënë ai ka një shpërputhje të
madhe midis premtimeve të tyre dhe realizimeve që i kanë bërë. Qeveria
politikën e jashtme më shumë e sheh si avokim dhe lobim dhe jo si dizajnim të
politikave afatgjata, e afatmesme, të cilat pastaj i nxjerrin edhe politikat e
shkurtra.
Edhe pse
janë shumë njerëz të kyçur në politikën e jashtme, kryetari i Komisionit thotë
që nuk ka parë ndonjë dokument, ku ju kanë të koordinuara përgjegjësitë, ku
janë të ndara detyrat dhe ku janë të planifikuara aktivitetet, e aq më pak që
ka vizion afatgjatë, afatshkurtër dhe afatmesëm.
Për ngutin e
zyrtarëve për të prezantuar njohjen, Kurti thotë që këta zyrtar më shumë janë
të preokupuar për kreditin që do të marrin për vete, se sa për njohjen e
shtetit të Kosovës.
“Përpjekjet
për t’i personalizuar njohjet aktuale, ato të shkuara, apo ato të pritura, janë
dëshmi që politika e jashtme e Kosovës është në fakt politik e brendshme, sepse
këta janë më tepër të preukupuar me kreditin që do të marrin personalisht, se
sa me përparimin që do të bëjë Kosova si shtet. Politika e jashtme nuk do të
duhej që të ketë probleme të tilla”, ka theksuar ai.
Nga ana
tjetër, ish-ministri i Jashtëm, Skënder Hyseni ka thënë se politika e jashtme e
Kosovës sot është shpërndarë, sa që nuk dihet që Kosova ka një politikë të
jashtme konsekuente dhe konsistente.
Hyseni ka
thënë se po bëhen gati dy vite dhe politika e jashtme e Kosovës është parë
ekskluzivisht në ndonjë takim krejtësisht protokollar, ose në përpjekje për të
sjell ndonjë njohje për shtetin e ri të Kosovës. Madje ai ka thënë se edhe këtu
ka dështime, përkundër paralajmërimit bombastik të disa strategjive për
sjelljen e njohjeve, e që fatkeqësisht ka ngecje në rrafshin e njohjeve.
Ish-diplomati
kosovar ka thënë se Ministria e Punëve të Jashtme ka dështuar në çështjet kyçe
dhe për këtë edhe qytetarët japin vlerësimin e tyre për politikën e jashtme si të
dështuar.
“Në të
gjitha ata segment ku Ministria e Punëve të Jashtme është si bartëse e
politikës së jashtme, ku do të duhej të ishte e pranishme dhe efektive, nuk
është dhe kjo mund të jetë arsyeja se pse qytetarët kanë përshtypjen që ka
dështuar politika e jashtme e Kosovës. Pastaj Ministria e Punëve të Jashtme ka
dështuar të adresojë çështje kyçe nga fushëveprimi i vet”, ka thënë Hyseni për
Kosovapress.
Për më tepër
ai këtë ministri e ka quajtur edhe joserioze karshi botës, pasi që siç ka thënë
ai prezanton në uebfaqen e saj shtete që nuk e kanë njohur Kosovën.
“Është lehtë
të flitet, mirëpo diplomaci serioze, moderne u lë vend rezultateve që flasin, e
nuk i proklamon rezultatet inekzistente. Kjo ministri është tej mase jo serioze
me botën në komunikim, sidomos me vendet që nuk e kanë njohur Kosovën. Ju mund
të irritoni një vend në mënyrë të pakthyeshme nëse në uebfaqen e Ministrisë së
Punëve të Jashtme e futni atë vend që e ka njohur Kosovën, ndërkohë që kjo nuk
ka ndodh dhe janë dy raste për keqardhje, janë Nigeria dhe Uganda, vende që
ende nuk e kanë njohur Kosovën dhe trajtohen që e kanë njohur”, ka deklaruar
ai.
Nga ana
tjetër edhe analisti politik, Behlul Beqaj nuk ka lënë pa kritikuar diplomacinë
e Kosovës, duke thënë se kjo vetëm sa po e reflekton politikën e brendshme.
“Realisht
politika e jashtme shpreh gjendjen dhe kualitetin e politikës së brendshme.
Nuancat i bëjnë vetëm liderët vizionarë dhe me integritet moral që në rastin e
Kosovës mungojnë. Prandaj nga politika jashtme ka qenë joreale të pritet më
shumë, pavarësisht se me politikë të jashtme janë marrë shumë zyrtarë, të cilët
kanë garuar më shumë mes vete se sa për interesin e Kosovës”, thotë Beqaj për
Kosovapress.
Madje ai ka
thënë se po të mos kishte qenë faktori ndërkombëtar, politikës së jashtme do
t’i shiheshin dështime edhe më të mëdha.
“Politika e
jashtme është në nivelin e politik bërjes së përgjithshme. Sikur mos të kishim
partnerët ndërkombëtar, do të dilte në sipërfaqe tërë diletantizmi politik, por
mbështetja ndërkombëtarë në anën tjetër, sa i ka ndihmuar politikës së jashtme,
aq e ka bërë atë të varur nga zyrtarët ndërkombëtar, në vend se të aftësohen
zyrtarët tanë për politik bërje të pavarur, për aq sa lejojnë rrethanat”,
vlerëson ai.
Ndërkohë
këshilltari i ministrit, Hoxhaj, Artan Behrami ka dhënë një përgjigje për
aktivitet e ministrit, Hoxhaj dhe siç ka thënë ai dyfishimin e njohjeve.
Sipas tij në
një vit e gjysmë të punës së ministrit, qytetarët e Republikës së Kosovës janë
dëshmitar për një dinamikë dhe kualitet të ri në politikën e jashtme.
Për më tepër
ai ka shtuar se ministri Enver Hoxhaj ka vizituar mbi 80 shtete të ndryshme të
botës, derisa në qendra vendimmarrëse, siç është Uashingtoni, Berlini, Londra,
Parisi, Roma e vende tjera, ka qenë nga disa herë.
“Gjatë këtij
mandati ka një dyfishim të numrin të njohjeve, në krahasim me numrin e njohjeve
të vitit 2010. Gjatë këtij mandati kemi dyfishim të marrëveshjeve bilateral të
nënshkruara, derisa kemi iniciuar mbi 70 marrëveshjeve tjera, që do të forcojnë
subjektivitetin ndërkombëtar të Kosovës dhe marrëdhëniet diplomatike mes
Republikës së Kosovës dhe shteteve të ndryshme të botës. Po ashtu ato do të
ndikojnë edhe në zhvillimin ekonomik të Kosovës”, ka thënë Behrami për
Kosovapress.
Po ashtu ai
ka thënë se gjatë këtij mandati ka një pesëfishim të organizimit të
konferencave ekonomike në shtete të fuqishme, të cilat do të nxisnin investimet
në Republikën e Kosovës.
Ai
gjithashtu ka përmendur se për herë të parë në historinë e re të Kosovës është
hartuar Strategjia për politikë të jashtme, Strategjia për përmbylljen e
procesit të njohjeve, Strategjia për diplomaci ekonomike dhe Strategjia për
diplomacinë digjitale.
Ndryshe edhe
pse kishte paralajmërime të shumta nga zëvendëskryeministri i Qeverisë së
Kosovës, Behgjet Pacolli dhe ministri Hoxhaj, se gjatë këtij viti do të vijnë
shumë njohje, një gjë e tillë ende nuk ka ndodhur.
Në faqen
zyrtare të ministrisë së Punëve të Jashtme figurojnë vetëm gjashtë njohje që
kanë ardhur këtë vit, njohje nga Republika e Ganës, Haitit, Ugandës, Sao Tome
dhe Principe, Brunesi Darussalam dhe Republika e Çadit, e fundit që ka ardhur
më 1 qershor./Kosovapress/
Comments (0)
Dërgoja shokut
Printo
