07.08.2012
Realizimi i një operacioni policor nga departamenti i hetimeve, konkretisht nga
drejtoria për hetimin e trafikimit të qenieve njerëzore, ka rezultuar me 22
viktima, të cilat shfrytëzoheshin seksualisht, dhe 11 të arrestuar nën dyshimet
për përfshirje në krim të organizuar.
Ministri i Punëve të Brendshme, Bajram Rexhepi, ka vlerësuar lart punën e
Policisë së Kosovës, duke shtuar se me rritjen e kapaciteteve të policisë dhe
profesionalizmin e tyre, do të ngrihet imazhi i Kosovës karshi ndërkombëtarëve.
“Janë identifikuar 22 viktima dhe janë arrestuar 11 persona, edhe pse aksioni
mund të vazhdojë edhe më tutje. Janë konfiskuar mjete monetare, armë dhe
logjistikë tjetër që është shfrytëzuar. Kjo e rrit besimin në Policinë e
Kosovës. I përgëzoj për një punë të suksesshme që janë duke bërë”, ka thënë
Rexhepi.
Në anën tjetër, Arben Paçarizi, drejtor i drejtorisë për hetimin e trafikimit
me qenie njerëzore, ka deklaruar se operacioni në fjalë ka qenë i koduar si
“Unaza” dhe, sipas tij, hetimet për këtë rast janë zhvilluar për më shumë se 12
muaj.
“Prokuroria Speciale e Kosovës ka udhëhequr hetimet e këtij rasti, i cili ka
qenë më kompleksi e që është hetuar nga drejtoria jonë. Ka të bëjë me pastrim
parash, falsifikim dokumentesh, trafikim me qenie njerëzore. Operacioni është
realizuar në Komunën e Gjakovës, në 11 lokacione: në 5 lokale të natës, 5
shtëpi banimi dhe një zyrë e punësimit rajonal - pjesë e Ministrisë së Punës
dhe Mirëqenies Sociale”, ka thënë Paçarizi.
Sipas tij, viktimat e trafikimit, të cilat janë shfrytëzuar seksualisht,
janë shtetase moldave.
“Viktimat janë të strehuara dhe po trajtohen konform proceduarave standarde të
operimit që i ka Zyra e Koordinatorit Nacional. Gjithashtu, janë konfiskuar
edhe rreth 12 mijë euro, telefona mobilë, laptopë që janë përdorur për
zhvillimin e krimit të organizuar”, ka deklaruar Paçarizi.
Të gjithë personave u është shqiptuar masa e parandalimit për 48 orë me urdhër
të prokurorit special.(rel)
Comments (0)
Dërgoja shokut
Printo
