Liberalizimi i vizave për qytetarët e Kosovës në zonën e Shengenit dhe
integrimi evropian, janë më shumë premtime fjalësh sesa punë që bëhet në
drejtim të arritjes së këtyre qëllimeve, thonë përfaqësuesit e partive politike
opozitare.
Ata theksojnë se ekzistojnë lloj-lloj mekanizmash të panevojshëm që kanë të
bëjnë me integrimet evropiane, në përgjithësi.
Anëtarja e Komisionit Parlamentar për Integrime Evropiane, Alma Lama, nga
subjekti politik Vetëvendosje, thotë se për integrimin e Kosovës në familjen evropiane,
nevojitet punë dhe jo themelimi i mekanizmave të shumtë e të panevojshëm.
"E vërteta është se në Kosovës, ka shumë retorikë pro Bashkimit Evropian dhe në
kuadër të kësaj retorike, krijohen shumë mekanizma të panevojshëm. Nuk punohet
në detyrat e shtëpisë, që i jep çdo vit Komisioni Evropian, i cili skanon
gjendjen në Kosovë. Ka shumë grupe koordinuese, ka shumë këshilla pro
integrimeve në një vend ku uniteti pro- integrimit është shumë i madh dhe nuk
ka kundërshtime", thotë Lama.
Në Kosovë, institucionet që punojnë në drejtim të Integrimit Evropian janë;
Ministria për Integrime Evropiane, Komision Parlamentar për Integrim Evropian,
Komisioni Ndërministror për Integrim Evropian, zyrat për integrim evropian në
secilën ministri dhe zyrtarë për integrim evropian në secilën komunë të
Kosovës.
Po ashtu, vepron edhe Komiteti i punës për Integrime Evropian, grupet punuese
për integrime evropian e të tjera.
Deputetja Lama thekson se Kosova ka nevojë për institucione të fuqishme, se sa
më shumë mekanizma për integrime që krijohen, aq me shumë shtohen mundësitë për
burokraci.
Imagjinoni, shumë mekanizma kërkojnë koordinim dhe koordinimi ngadalëson dhe
vështirëson punët.
"Imagjinoni, shumë mekanizma kërkojnë koordinim dhe koordinimi ngadalëson dhe
vështirëson punët. Siç e thashë, krijimi i tyre është më shumë për treguar se
jemi të interesuar për të punuar sesa vërtet dëshmohet se jemi të interesuar
për të punuar".
"Qeveria duhet të përpiqet dhe të angazhohet në implementimin e ligjeve, ashtu
sikur edhe institucionet e tjera që kanë të bëjnë më drejtësinë", thekson Lama,
Për të lehtësuar rrugën e Kosovës në BE, ekziston edhe Këshilli Kombëtar për
Integrime Evropiane, të cilin e udhëheq presidentja e Kosovës. Këshilli
Kombëtar për Integrime Evropian synon të bashkërendojë dhe krijojë konsensus
nacional në lidhje me integrimet.
Aty bëjë pjesë udhëheqësit më të lartë të institucioneve të vendit, duke
përfshire gjykatat, prokuroritë, partitë politike, shoqëria civile etj.
Po ashtu, me qëllim të Integrimit të Kosovës në BE, është themeluar edhe Task -
Forca për Integrim Evropian. Task Forca është ndërmarrje e re e përkohshme, e
cila synon të forcojë dinamikën dhe cilësinë në kuadër të procesit të
integrimit evropian.
Ky mekanizëm mbledh rreth vetes ekspertë të ndryshëm nga mbarë strukturat
qeveritare dhe jo-qeveritare, me qëllim të diskutimit dhe analizimit të
gjithëmbarshëm të gjendjes momentale dhe të sfidave që duhet adresuar në kuadër
të këtij procesi.
Zyrtarët e Ministrisë së Integrimit Evropian, thonë se të gjithë këta mekanizma
dhe këshilla janë të rëndësishëm.
Koordinatori teknik për çështjen e liberalizimit të vizave në Ministrinë e
Integrimit, Besnik Vasolli, theksoi për Radion Evropa e Lirë se koordinimi
ndërmjet këtyre mekanizmave, është i mirë.
Kështu që konsideroj që koordinim ka pasur, ka dhe sigurisht që do të ketë
"Ministria e Integrimit është koordinatore e procesit të integrimit evropian.
Të gjitha këto komisione punuese janë të krijuara nga kjo ministri. Pra,
koordinimi është shumë natyral që është brenda një institucioni, ku në ato
komisione marrin pjesë zyrtarë të ministrive të ndryshme, të agjencie dhe
organizatave të tjera edhe komunale. Kështu që konsideroj që koordinim ka
pasur, ka dhe sigurisht që do të ketë", shprehet Vasolli.
Pavarësisht faktit që Bashkimi Evropian nuk ka caktuar datën për fillimin e
negociatave për Marrëveshjen e Stabilizim-Asociimit, Qeveria e Kosovës është
shprehur e gatshme që t'i përmbushë kriteret e përcaktuara nga Brukseli.
Ministrja Vlora Çitaku pati deklaruar se për shkak të mospajtimeve në Bruksel,
Kosova ka mbetur prapa në proceset integruese.