Presidenti Obama në ditën e tij të parë në Shtëpinë e Bardhë
E Mërkurë, 01.21.2009, 11:47am (GMT+1)
VOA -Presidenti Barak Obama pritet të merret me çështje të politikave të jashtme dhe ekonomike gjatë ditës së tij të parë të punës si President i Shteteve të Bashkuara. Këshillitarët e tij thonë se ai do të takohet me ekipin e Sigurisë Kombëtare për të rivlerësuar luftrat në Irak dhe Afganistan. Gjatë gjithë fushatës presidenciale, zoti Obama premtoi tërheqjen brenda 16 muajve të trupava luftarake nga Iraku dhe një vështrim të ri të mënyrës sesi po drejtohet lufta në Afganistan. Sipas njoftimeve, këshilltarët e zotit Obama thonë se ai do të emërojë senatorin Xhorxh Miçëll si të dërguar për Lindjen e Mesme.
Po sot presidenti pritet të takohet me këshilltarët e tij ekonomikë si dhe të lëshojë rregullore të reja ku do të kërkojë nga institucionet që marrin ndihmë financiare nga paketa qeveritare të jenë më transparentë mbi mënyrën sesi shpenzohen këto para.
Ndërkaq një nga aktet e para të nënshkuara nga presidenti Obama thotë se agjencitë federale urdhërohen të ndalojnë të gjitha rregulloret ende nën shqyrtim derisa administrata e re t'i rishikojë ato.
Senati amerikan do të vazhdojë sot me miratimet e anëtarëve të kabinetit të zotit Obama. Sot pritet të hidhet në votë miratimi i senatores Hillari Klinton si Sekretare e Shtetit, që u shty dje pas kundërshtimit të senatorit republikan Xhon Kornin. /Voal-online
|