VOAL - Online Zëri i Shqiptarëve

MARRËVESHJA E STABILIZIM-ASOCIIMIT BE-KOSOVË MUND TË NËNSHKRUHET BRENDA PRESIDENCËS ITALIANE E Premte, 07.25.2014, 05:30pm (GMT1) Në Bruksel, përfaqësuesit e Kosovës dhe të Komisionit Evropian hodhën sot inicialet e tyre në marrëveshjen e Stabilizim Asociimit. Me këtë shënohet edhe përfundimi zyrtar i procesit negociator dhe dakordimi i të dyja palëve mbi tekstin e negociuar të marrëveshjes. Hapi i ardhshëm do të jetë miratimi i marrëveshjes nga Këshilli i Bashkimit Evropian dhe nënshkrimi i marrëveshjes. Duke e cilësuar si një ngjarje me rëndësi historike autoritetet në Kosovë thanë se kjo marrëveshje do të jetë themel i afrimit të Kosovës me Bashkimin Evropian. Parashikimet flasin për mundësinë që nënshkrimi i saj të ndodhë brenda gjashtë muajve të ardhshëm. Kjo mundësi është diskutuar edhe gjatë vizitës së mbrëmshme në Prishtinë të ministres së jashtme të Italisë, Federica Mogherini, vendi i së cilës kryeson aktualisht me Bashkimin Evropian. Kosova ishte ngecur në këtë proces për shkak të mungesës së konsensusit brenda Bashkimit Evropian, pesë vende anëtare të të cilit vazhdojnë të mos e njohin pavarësinë e Kosovës. Ndërsa, tani është arritur pajtimi që kjo marrëveshje të mos ketë nevojë të ratifikohet nga parlamentet e shteteve anëtare, siç ka ndodhur me vendet tjera. Negociatat për marrëveshjen e stabilizim asocimit filluan në tetor të vitit 2013 dhe ato u siguruan pas angazhimit të Kosovës në bisedimet me Serbinë për normalizimin e marrëdhënieve ndërmjet të dyja vendeve. Serbia nga ana tjetër, hapi negociatat për anëtarësim në Bashkimin Evropian në janar të këtij viti.za www.voal-online.ch

Copyright © 2005-2008 Nulled by [x-MoBiLe]. All rights reserved.