KUVENDI I SHQIPËRISË KËRKON TOLERANCË ZERO NDAJ VJEDHJES SË BANKËS QENDRORE
E Mërkurë, 07.30.2014, 02:08pm (GMT+1)
Guvernatori i Bankës së Shqipërisë Ardian Fullani ka raportuar përpara komisionit parlamentar të Ekonomisë në lidhje me vjedhjen e 7 milionë dollarëve në qendrën e Emisionit në Linzë.
Mbledhja është zhvilluar për rreth dy orë me dyer të mbyllura.
Në një deklaratë për mediat pas mbledhjes kreu i Komisionit të Ekonomisë, deputeti socialist Erion Braçe tha mes të tjerash:
"Morëm një informacion të detajuar lidhur me gjithë çfarë ka ndodhur me Bankën e Shqipërisë për këtë ngjarje dhe një analizë paraprake me Bankën e Shqipërisë për përgjegjësitë".
"Kemi kërkuar tolerancë zero për cilindo që është përfshirë në këtë ngjarje duke nisur nga Guvernatori deri te zyrtari i fundit në aspektin administrativ, ligjor dhe penal".
Raportimi i guvernatorit Ardian Fullani, vjen pas deklaratës zyrtare të Këshillit Mbikëqyrës, sipas së cilës në Bankën e Shqipërisë janë vjedhur milionë lekë, prej të cilave 143 milionë lekë të nxjerra nga qarkullimi për t'u asgjësuar.
Sipas Këshillit Mbikëqyrës, përvetësimi i parave ka ndodhur në hallkën e ndërmjetme që ka natyrën e një sporteli operacional ku kryhen veprimet e përditshme me paratë e thata.
Mosrespektimi me rigorozitet i procedurave nga disa prej punonjësve krijoi mundësi për abuzime të kësaj natyre, bën me dije Këshilli.
Në deklaratën e Bankës së Shqipërisë thuhet se "rezervat e parasë cash (thesari për analogji) të magazinuara në Bankën e Shqipërisë në ambientet e sigurisë së lartë nuk janë prekur".
Me përfundimin e raportit të kontrollit, do të vazhdojë marrja në pyetje e punonjësve të Qendrës së Emisionit të Monedhës dhe zyrtarë të Bankës së Shqipërisë.
Prokuroria u kërkoi të gjitha bankave të nivelit të dytë, që të kontrollojnë llogaritë bankare të 20 familjarëve të të arrestuarve.
Në listën e këtyre 20 personave, janë familjarë të 2 të arrestuarve, si prindër, vëllezër, motra, kushërinj të parë apo te afërm të tjerë.
Një javë më parë kontrolli i brendshëm i Bankës së Shqipërisë, në momentin që ka tentuar të bëj inventarizimin e parave që do të asgjësoheshin ka konstatuar mangësi në pakot e mbushura me kartëmonedha.
I arrestuar nga policia për këtë vjedhje është Ardian Bitraj, përgjegjës i sektorit të Stokut, në godinën e Emisionit të Monedhës i cili e ka pranuar akuzën e vjedhjes së rreth 7 milionë dollarëve, si dhe Mimoza Bruzaj përgjegjëse e arkës në Emisionin e Monedhës, e cila akuzohet si bashkëpunëtore në vjedhje.
www.voal-online.ch
|