VOAL - Online Zëri i Shqiptarëve - RRETH 30 ORGANIZATA SHQIPTARE KUNDËR JANULLATOSIT

Komiteti Koordinues për Mbrojtjen dhe Zgjidhjen e Çështjes Kombëtare Shqiptare që përbëhet nga rreth 30 shoqata ka kërkuar të ndalohet vizita e kryepeshkopit Janullatos, më 24 gusht, në kishën që mban emrin e Shën Kozmait në Kolkondë të Fierit,raportojnë medie shqiptare.

Komiteti reagoi ndaj këtij lajmi, duke thënë se "duhet të nderojmë figurat e kombit shqiptar dhe jo ato antishqiptare si Shën Kozmai".

"Çdo komb ka të drejtë të shenjtërojë heronjtë e saj. Janullatos dhe grekët të përkujtojnë Shën Kozmanë e tyre dhe jo Kozma shejtanin për shqiptarët.

Hapi në territorin e Shqipërisë rreth 230 shkolla greke, duke mallkuar gjuhën shqipe, mbylli me dhjetëra kisha ku mësohej në shqip.

Jo Janullatos, mos abuzo me miqësinë e shqiptarëve, me tolerancën e tyre fetare se është e shenjtë për ne.

Ne duam të na nderosh Marko Boçarin, Naum Veqilharxhin, Dhaskal Todrin, Fan Nolin, Naum Priftin, Petro Nini Luarasin, Motrat Qirjazi, Mihal Gramenon.

Mos preket dhe mos abuzohet me tolerancën fetare të shqiptarëve se e kemi gjënë më të shenjtë dhe amanet nga gjaku i rilindësve tanë ndër shekuj", tha një nga përfaqësuesit e komitetit.

Sipas 26 organizatave joqeveritare, të përfaqësuara nga Komiteti për Mbrojtjen dhe Zgjidhjen e Çështjes Kombëtare, Shën Kozmai ka qenë një person që i trumbetonte gjuhës greke, duke anashkaluar atë shqiptare.

Sipas tyre, nderimi i tij duhet të bëhet në vendin e tij të lindjes dhe jo ne Kolkondas, ku sipas tyre është ekzekutuar.

Kisha Autoqefale në Tiranë, në bashkëpunim me Bashkinë e Fierit, po merren me organizimin e 300- vjetorit të lindjes së Shën Kozmait.

Festimet do të bëhen në Fier, në fshatin Kolkondas, më datë 24 gusht.

Në Kolkondas gjendet një kishë që mban emrin e tij dhe aty mbahen çdo vit tubime dhe mesha për të përkujtuar Shën Kozmain.