VOAL - Online Zëri i Shqiptarëve - KUVENDI SHKARKON FULLANIN SI GUVERNATOR

TIRANE - Kuvendi ka shkarkuar sot me 72 vota pro dhe 6 kundër Ardian Fullanin si Guvernator i Bankës së Shqipërisë dhe Inspektoren e Përgjithshme, Elivar Golemi, pas skandalit të vjedhjes së 713 milionë lekëve nga Thesari i Shtetit. Për Golemin votuan që të shkarkohet 76 deputetë, 1 kundër dhe një abstenoi.

Mësohet se votat kundër shkarkimit të Fullanit ishin 5 të së majtës dhe një nga PDIU. Ndërkohë që mësohet se kryeministri Edi Rama ka lënë sallën e Kuvendit duke mos votuar për shkarkimin e Fullanit.

Baza ligjore e shkarkimit të dy zyrtarëve ishte "Për shkelje të etikës në punë dhe cënim të thellë të interesave të Bankës së Shqipërisë".

Kryetari i Komisionit të Ekonomisë Erion Braçe i kërkoi sot Kuvendit shkarkimin e Guvernatorit Ardian Fullanit dhe Inspektores së Përgjithshme Elivar Golemit nga BSH. Sipas Braçes, Komisioni i Ekonomisë ka votuar unanimisht për shkarkimin e Fullanit dhe Golemit.

Ish-guvernatori Fullani ndodhet tashmë në masë arrest shtëpie pas skandalit të vjedhjes së 713 milionë lekëve në Bankën e Shqipërisë ndërsa kryeinspektorja Golemi mori masën arrest me burg.

Fullani dhe Golemi akuzohen për shpërdorim detyre. Dy ditë më parë grupi parlamentar socialist vendosi unanimisht të votojë shkarkimin e dy zyrtarëve të lartë të BSH-së. Burimet nga mbledhja e grupit bënë të ditur për "Gazeta Shqiptare" se ky është vendim politik dhe se nuk do të tolerohet asnjë votim ndryshe. Në përfundim të mbledhjes së grupit parlamentar socialiste, ishte nënkryetari, Erjon Braçe që me anë të një postimi në rrjetin social të "Facebook"- ut, bëri të ditur se "të enjten në Kuvend, i shkarkojmë të dy; guvernatorin e Bankës së Shqipërisë dhe inspektorin e përgjithshëm të Bankës së Shqipërisë! Të paktën në Bankë nuk do jenë më pas vjedhjes historike të ndodhur atje!".

Ndërsa më herët kryeministri, Edi Rama me anë të një postimi po në "Facebook", teksa iu jepte përgjigje miqve virtualë lidhur me vendimin e Gjykatës së Apelit që dha masën e arrestit shtëpiak për Fullanin, tha ndër të tjera se "unë nuk jam as prokuror dhe as gjykatës".