BUSHATI DHE AHMETAJ SOT NË BEOGRAD
E Enjte, 10.23.2014, 08:56am (GMT+1)
Ndërkohë që të gjithë flasin për vizitën e kryeministrit Edi Rama në Beograd, dy ministrat e kabinetit të tij prenë dje biletën për të shkuar sot në Serbi. Ministrin e Jashtëm shqiptar Ditmir Bushati dhe ai i Ekonomisë Arben Ahmetaj do të marrin pjesë sot në Konferencën e Ministrave të Ballkanit si vazhdim i samitit të Berlinit, i inicuar nga kancelarja gjermane, Angela Merkel.
Konferenca në Beograd është organizuar nga Komisioni Evropian dhe cilësohet si vazhdimësi e takimeve dhe zotimeve nga Konferenca e Berlinit, për të thelluar edhe me tej marrëdhëniet mes vendeve në rajon dhe për të shtyrë përpara projektet e përbashkëta.
Lajmi për pjesëmarrjen e dy ministrave bëhet i ditur nga Ora News, sipas të cilës, Bushati e Ahmetaj kanë konfirmuar pjesëmarrjen në takimin për rajonin. Përveç Shqipërisë, Serbisë, Bosnje-Hercegovinës, Maqedonisë dhe Malit të Zi, për herë të parë, do të jenë edhe dy ministrat kosovarë, që e çojnë në 4 numrin e ministrave shqiptarë në Beograd.
Ministri i Zhvillimit Ekonomik të Kosovës, Fadil Ismajli dhe ai i Punëve të Jashtme, Enver Hoxhaj, kanë shkuar mbrëmë në Beograd, në Konferencën Ministrave të Jashtëm të Ballkanit. Takimi drejtohet nga eurokomisioneri në largim Stefan Fule dhe Jyrki Katainen zëvendëspresident i KE-së, ndërkohë, që fjalën hapëse të konferencës, pritet ta mbajë kryeministri i Serbisë, Aleksandar Vuçiç.
Takimi përkon në të njëjtën ditë kur UEFA do të japë vendimin për fatin e ndeshjes së lënë përgjysmë mes serbëve dhe shqiptarëve.
www.voal-online.ch
|