Ministria e Arsimit dhe e Sportit, Lindita
NikollA ka reaguar me një postim të gjatë në Facebook kundër vendimit të
dhënë dje nga UEFA për ndeshjen Serbi-Shqipëri. Qëndrimi i saj është
mbështetur edhe nga Kryeministri Edi Rama, ndërsa mesazhi shoqërohet
edhe me një video ku dallohen qartë thirrjet në stadiumin e Beogradit,
"Vrite , vrite shqiptarin". Kjo video e FSHF-së i është dërguar UEFA-s,
por që nuk e vlerësoi.
"Si Ministre e Sportit e ndjej për detyrë t'ju kërkoj të
bashkoheni me mua për të vënë në jetë një ide të thjeshtë: Në këtë
video është dokumentuar e vërteta që UEFA mundi ta shihte dje pa mundur
ta respektojë, për të respektuar Fair Play-n dhe vetveten! Por këtë të
vërtetë bota nuk e ka parë përveçse në disa copëza shumë të vogla që
edhe ato u sfumuan nga hutimi i çuditshëm pas një kukulle fluturake me
një banderolë. Prandaj shpërdajeni sa të mundni përmes internetit në
drejtim të çdo gazete, televizioni, federate futbolli, klub futbolli
nëpër Evropë e botë... Postojeni në çdo adresë ku mendoni se dikush duhet
ta shohë këtë të vërtetë dhe të bashkohet me ne në bindjen se vendimi i
djeshëm i UEFA-s ka cënuar drejtësinë, Fair Play-n dhe Respektin që UEFA
i promovon aq shumë. Ndajeni përmes facebook-ut tuaj këtë videodokument
të realizuar ekskluzivisht për Komisionin Disiplinor të UEFA-s, me të
gjithë yjet e futbollit europian dhe me çdo futbollist që ndiqni në
rrjetet sociale", shkruan NikollA.