SOT NË PRISHTINË PROTESTOHET PËR TREPÇËN DHE KUNDËR JABLLANOVIÇIT
E Shtunë, 01.24.2015, 09:05am (GMT+1)
 Sot në Prishtinë pritet të mbahet një protestë gjithë popullore kundër deklaratave të ministrit për Komunitet dhe Kthim në Qeverinë e Kosovës, Aleksandër Jabllanoviq.
Protesta është organizuar nga shoqata "Thirrjet e Nënave" nga Gjakova por shumë parti politike dhe organizata jo qeveritare kanë paralajmëruar pjesëmarrjen.
Përveç kundër Jabllanoviqit, sot do të protestohet edhe në përkrahje të gjigantit metalurgjik "Trepça", për të cilën minatorët e këtij gjiganti bënë grevë tri ditëshe.
Partitë që kanë paralajmëruar se do të marrin pjesë në protestë janë Lëvizja Vetëvendosje, Aleanca për Ardhmërinë e Kosovës, Nisma për Kosovën, Bashkimi Demokratik,Lëvizja e Re Demokristiane, OJQ-të , organizatat e luftës së UÇK-së, Instituti Demokratik i Kosovës, Sindikata të punëtorëve, si dhe disa prej organizatave studentore.
Protesta të ngjashme janë mbajtur në Gjakovë, Gjilan, Deçan, Malishevë, Krushë të Madhe, etj.
Ministri për Komunitete dhe Kthim, Jabllanoviq i ka quajtur egërsira nënat gjakovare të cilat po protestonin kundër vizitës së disa pelegrinëve serbë në kishën e qytetit të Gjakovës.
Ndonëse Jabllanoviq ka kërkuar falje pas disa ditësh, protestuesit nuk e pranojnë faljen por kërkojnë nga kryeministri Isa Mustafa që ta shkarkojë Jabllanoviqin.
Nisja e protestuesve do të fillojë nga Biblioteka Kombëtare e Kosovës, në orën 14:00. www.voal-online.ch
|
Comments (0)
Dërgoja shokut
Printo
