VOAL - Online Zëri i Shqiptarëve

YMERI - MUSTAFA FALSIFIKUES, I DORËZUAR, I NËNSHTRUAR DHE GËNJESHTAR E Djelë, 01.25.2015, 04:27pm (GMT1) Deputeti i Lëvizjes Vetëvendosje, Visar Ymeri, ka reaguar ndaj deklaratave të kryeministrit të Kosovës, Isa Mustafa, për sa i përket ligjit për Trepçën. Ymeri, në një shkrim të publikuar në rrjetin social Facebook, e quan Mustafën gënjeshtar dhe hipokrit. "Sikur në shumë raste tjera edhe në këtë adresim tijin vërehet qartë hipokrizia e tij, dhe tendenca patologjike për të gënjyer. Ai thotë se ne e paskemi votuar kundër Ligjin për riorganizimin e ndërmarrjeve të caktuara... dhe se kështu paskemi dashur që Trepçën ta dërgojmë në likuidim. Këtë Ligj në vitin 2011 e ka kundërshtuar vetëm Lëvizja Vetëvendosje! LDK-ja në atë kohë edhe pse në opozitë e patën votuar me disa përjashtime të disa deputetëve individual. Që atëherë ne patëm thënë se ky ligj e rrezikon Trepçën me likuidim, dhe se vendimmarrjen për të ia lë në dorë pretendentëve kreditorë. Ishte e qartë: Ligji ishte kopje e Rregullores së UNMIK-ut", ka thënë shefi i Grupit Parlamentar të Vetëvendosjes në Kuvendin e Kosovës, Visar Ymeri. Ai thotë se Isa Mustafa dhe qeveria e tij iu nënshtruan kërkesave të Serbisë për Trepçën, duke përmendur tërheqjen e tij të së hënës nga miratimi i plotësim ndryshimit të Ligjit për ndërmarrjet publike "për ta transformuar, dhe kështu shpëtuar, Trepçën në ndërmarrje publike". "Të njëjtën ditë e miratoi në Qeverinë që ai e udhëheq të njëjtin ligj me ndryshime drastike të cilat i fuqizonin komunat, dhe e s'postonin çështjen e Trepçës në negociata me Serbinë. Më vonë doli që edhe këtu Isa Mustafa falsifikoi dokumentin zyrtar pasi që e miratoi një version tjetër në Qeveri dhe e nënshkroi një më të dëmshëm për ta sjellë në Kuvend", thekson Ymeri. "Po çfarë të pritet prej njeriut që për 5 muaj rresht i mashtroi anëtarësinë e vet dhe qytetarët e vendit se kinse po përpiqej për ta çliruar Republikën e Kosovës nga kapja ShIK-iste, i cili në fund e tradhtoi edhe fjalën e edhe nënshkrimin e dhënë në marrëveshjen e 10 shtatorit. Ky natyrisht se falsifikon. Çfarë të pritet prej njeriut i cili i del haptazi në mbrojtje fashizmit të Serbisë brenda Qeverisë (Listës serbe) duke tentuar ta arsyetojë ligjërimin publik e mendimin politik të tyre? Ky natyrisht se dorëzohet. Çfarë të pritet prej njeriut që i ulet në prehër Kadri Veselit të ShIK-ut duke e amnistuar e shpërlarë atë? Ky natyrisht se nënshtrohet. Çfarë të pritet prej njerëzve uzurpator të kryeqytetit të vendit të cilët nën patronazhin e "˜akademikut' janë kapur fortë nga krimi në Prishtinë dhe po tentojnë ta mirëmbajnë atë edhe në kundërshtim me vendimet institucionale të qeverisjes lokale e të gjykatave? Këta natyrisht që kapen, dhe e kapin shtetin", shton Ymeri. Më tutje, Ymeri ka thënë se Mustafa, sikurse edhe Thaçi, Serinë e sheh si mike, e Lëvizjen Vetëvendosje si armike të Kosovës. "Isa Mustafa u kishte thënë sot qytetarëve që mos të frikësohen nga Serbia por nga ne, Lëvizja Vetëvendosje! Njësoj sikur Thaçi ky Serbinë po e sheh si mike e Lëvizjen Vetëvendosje armike të Kosovës. Kjo u dëshmua në shpejtësinë me të cilën arriti marrëveshje me Listën Serbe. 3 muaj iu deshën Mustafës ta nënshkruajë marrëveshjen me Vetëvendosjen e cila kishte për qëllim ta ndërronte kursin e shtetit për ta nxjerrë atë nga negociatat e kompromiset e vazhdueshme me Serbinë, dhe 3 orë iu deshën ta pranojë marrëveshjen me Listën Serbe përmes së cilës Serbia fiton peshë të jashtëzakonshme vendimmarrjeje në institucionet qendrore të Kosovës", ka përfunduar Ymeri.kd www.voal-online.ch

Copyright © 2005-2008 Nulled by [x-MoBiLe]. All rights reserved.