EDHE DEPUTETI ASTRIT VELIAJ DEL KUNDËR BASHËS - KA IKUR KOHA E ZVARRANIKËVE POLITIKË
E Hënë, 03.02.2015, 11:18am (GMT+1)
Shtohen zërat kundër kryetarit të Partisë Demokratike, Lulzim Basha. Mënyra e ndarjes së koordinatorëve për të përgatitur fushatën elektorale për zgjedhjet e 21 qershorit është kundërshtuar edhe nga deputeti i qarkut të Beratit, Astrit Veliaj.
Sipas tij vendime të tilla merren pas diskutimeve me kolegët dhe jo me emërime të kryetarit. Dy ditë më parë ishin Enkelejd Alibeaj dhe Arben Imami që kundërshtuan detyrën e caktuar nga kryetari i selisë blu.
Deklarata
"Kundërshtoj mënyrën që ka zgjedhur lidershipi i PD-së për të bërë ndarjen e koordinatorëve. Partia nuk funksionon me emërim, por funksionon me diskutim midis kolegëve për të vendosur më të mirën.Ka ikur koha e zvarranikëve politikë që zvarriten në mënyrë vertikale, por është koha e dinjitetit njerëzor ku secili vlerësohet sipas kontributit të vet", - ka deklaruar Veliaj. Dy ditë më parë ka qenë ishte ish-ministri Enkelejd Alibeaj, i cili ka refuzuar detyrën e caktuar nga Basha për të drejtuar shtabin elektoral të Tepelenës dhe Mallakastrës. Madje mësohet se ish-ministri nuk do të jetë më aktiv në politikën ditore të PD-së. I pakënaqur nga detyra e caktuar ka qenë dhe Arben Imami, i cili, së bashku me Eduart Selamin, nuk do të jenë më në Elbasan.
Imami nuk e ka pritur mirë drejtimin e fushatës së Shkodrës, ku nuk është më e ngarkuar ish-nënkryetarja, Jozefina Topalli. Zona është ndryshuar edhe për Genc Pollon, i cili do të koordinojë procesin në Fier. Genc Ruli në Gjirokastër është zëvendësuar nga Tritan Shehu. Ndërsa Dropullin selia blu ia ka besuar Spiro Kserës.
www.voal-online.ch
|