Dy
partitë politike opozitare në Kuvendin e Kosovës, Lëvizja Vetëvendosje
dhe Aleanca për Ardhmërinë e Kosovës, paralajmërojnë se sërish do të
organizojnë protesta, pasi Qeveria e Kosovës nuk ka bërë asnjë veprim në përgjigje të kërkesave të opozitës në protestën e fundit.
Partitë politike opozitare, Lëvizja Vetëvendosje, Aleanca për
Ardhmërinë e Kosovës dhe Nisma për Kosovën më 18 prill mbajtën një
protestë me kërkesa kundër shtrenjtimit të energjisë elektrike, kundër
kontrollit shtetëror mbi transmetuesin publik, Radio-Televizionin e
Kosovës, kundër uzurpimit të sistemit gjyqësor dhe kundër formimit të
Asociacionit të komunave me shumicë serbe.
Kryeministri i Kosovës, Isa Mustafa, ka deklaruar të
shtunën se Qeveria e Kosovës, ka një program qeverisës që do të
zbatohet dhe nuk do të merret me atë çka thotë opozita.
"Asnjë afat nuk na bën përshtypje, sepse programi nuk mund të
afatizohet në dy javë apo tre javë. Asnjë veprim nuk do ta bëjmë në bazë
të ultimatumeve. Do të punojmë në mënyrë stabile, ashtu siç jemi duke
punuar dhe në mënyrë stabile do ta çojmë mandatin deri në fund", ka deklaruar Mustafa, deri sa i ka bërë një vizitës Panairit të Përgjithshëm Ndërkombëtar "Prishtina 2015".
Kryetari i Lëvizjes Vetëvendosje, Visar Ymeri, ka
thënë se Qeveria e Kosovës, jo vetëm që nuk i ka adresuar kërkesat, por
ka vazhduar me avazin e vjetër duke e forcuar, siç është shprehur ai,
"kapjen e shtetit".
Ymeri, duke folur në një konferencë me gazetarë, ka theksuar se
protesta mbetet e vetmja zgjidhje për përmbushjen e kërkesave të tyre.
"Në këtë drejtim, është e domosdoshme që të intensifikohen
aksionet dhe veprimet politike, në mënyrë që ky shtet i Kosovës të
çlirohet nga kapja dhe institucionet e Kosovës t'i kthehen interesit të
qytetarëve. Natyrisht që qeveria e kapjes nuk mund të jetë edhe qeveri e
republikës, ndërkohë që qytetarët e organizuar janë fondamenti i
republikës", është shprehur Ymeri.
Edhe përfaqësues nga partia politike Aleanca për Ardhmërinë e
Kosovës, kanë thënë se afati dyjavor për Qeverinë e Kosovës, që të nisë
implementimin e kërkesave të dala nga protesta e fundit, ka skaduar dhe
se sipas tyre, deri tash nuk ka pasur asnjë ndryshim.
Nënkryetari i kësaj partie, Ahmet Isufi, ka thënë në
një konferencë me gazetarë se Qeveria, deri tash nuk ka nisur
realizimin e kërkesave dhe kjo, sipas tij, tregon për mospërfilljen e
kërkesave të të gjithë qytetarëve.
"Në ditët në vijim do të kemi qëndrimin tonë për protestat e
ardhshme. Qeveria nuk po ofron tjetër alternativë, nuk po përgjigjet,
madje po injoron dhe po shihet se nuk është e gatshme t'i bëjë veprimet e
duhura, prandaj opozita do të bashkohet edhe më shumë dhe qytetarët
sigurisht se do të përgjigjen edhe më shumë, sepse kjo është
mospërgjigje ndaj qytetarëve të Kosovës", ka deklaruar Isufi.
Ai ka shtuar se "organizimi i protestave gjithë popullore ka mbetur
si e vetmja mënyrë për të luftuar kapjen e shtetit, uzurpimin dhe
zaptimin e shtetit dhe të ardhmes së njerëzve të këtij vendi".
Tri partitë opozitare, Lëvizja Vetëvendosje, Aleanca për Ardhmërinë e
Kosovës dhe Nisma për Kosovën, patën bojkotuar vazhdimin e seancës
plenare të 16 prillit për shkak se nuk u përfshi në rendin e ditës
diskutimi për peticionin me mbi 30 mijë nënshkrime kundër shtrenjtimit
të energjisë elektrike. rel