QIK - Kryeministri Hashim Thaçi gjatë takimi sot me kryetarët e komunave të Kosovës, ka diskutuar lidhur me koordinimin e aktiviteteve shtetërore me të cilat pritet të festohet 17 shkurti - njëvjetori i shpalljes së Kosovës shtet i pavarur dhe sovran. Kryeministri para kryetarëve të komunave të Republikës së Kosovës ka thënë se gjatë këtij viti të parë të shtetit tonë të pavarur dhe sovran të gjithë ne jemi përballur me sfida të jashtëzakonshme, por edhe sukseset kanë qenë të mëdha. "Është moment i kremtimit dhe krenarisë, por edhe moment i vlerësimit për atë që kemi bërë gjatë një viti ekzistence të shtetit tonë dhe fuqizimit të përkushtimeve tona për detyrat e reja që kemi përpara", tha Thaçi. Të gjithë bashkë, hap pas hapi, ai tha se ia dolëm t'i funksionalizojmë institucionet e shtetit tonë demokratik: simbolet shtetërore, kushtetutën e standardeve më të larta demokratike, kompletimin e mekanizmave të qeverisjes dhe atyre të sigurisë nacionale. Ndërkaq krahas kësaj, shtoi ai, është përmirësuar kualiteti i qeverisjes dhe është ndërtuar një ambient të sigurt për nxitjen e zhvillimit ekonomik të vendit tonë. Thaçi theksoi se për asnjë moment nuk duhet harruar ndihmën e pakursyer të miqve ndërkombëtarë, në krye me Shtetet e Bashkuara të Amerikës dhe Bashkimin Evropian, që u gjetën pranë nesh në të gjitha situatat e ndërlikuara që kaluam. "Pas një viti pavarësie, të gjithë ne, qytetarët e Republikës së Kosovës, kemi të drejtë të ndjehemi krenarë me faktin se nuk i zhgënjyem pritjet e miqve të lirisë sonë", the kreu i Ekzekutivit. Thaçi nga kryetarët e komunave kërkoi që këtë frymë të dinjitetit e tolerancës ta dëshmojnë edhe në këtë përvjetor të parë të pavarësisë sonë, duke dërguar mesazhin e qartë, ashtu si një vit më parë, se "liria jonë, shteti ynë, nuk është kërcenim për askënd, por vetëm faktor paqeje dhe stabiliteti në rajon". Por Thaçi paralajmëroi se çdo incident eventual, çdo shfaqje mosdurimi, shkon drejtpërdrejt në dëm të interesave të shtetit tonë të pavarur dhe sovran dhe në favor të atyre që ende flasin kundër Pavarësisë së Kosovës./Voal-online.