VOAL - Online Zëri i Shqiptarëve | ||||
Ish të përndjekurit padisin në Strasburg Gjykatën Kushtetuese E Enjte, 02.19.2009, 06:29pm (GMT1) 55 - Ish-të Përndjekurit Politik deklaruan sot se do t'i drejtohen Gjykatës së të Drejtave të Njeriut në Strasburg për të kërkuar të drejtat e tyre legjitime, "të cënuara nga vendimi i Gjykatës Kushtetuese që pezulloi ligjin e lustracionit". "Jemi thellësisht të zhgënjyer dhe të irrituar nga vendimi i marrë nga Gjykata Kushtetuese. Pas këtij vendimi ne mbetemi i vetmi vend në Europë që nuk është ndarë ende nga krimet e diktaturës komuniste dhe nuk ka hapur dosjet e bashkëpunëtorëve të sigurimit të shtetit", tha Bedri Blloshmi, i cili lexoi deklaratën e përbashkët të shoqatave të ish-të përndjekurve politikë. Ish të përndjekurit kanë njoftuar se një grup avokatësh, ndër më të njohurit në vend, po përgatisin padinë që do të ngrihet në Gjykatën e të Drejtave të Njeriut, në Strasburg, pasi, sipas tyre "me të drejtat legjitime të ish-të përndjekurve nuk mund të tallet më as Fehmi Abdiu dhe as Partia Socialiste, trashëgimtarja e Partisë së Punës". Gjatë këtyre 18 viteve, u shpreh Blloshmi, "ne kemi pritur reagimin e institucioneve të shtetit për të kontribuar në vendosjen e paqes sociale në vend dhe për të kuruar plagët e së shkuarës, duke mos i lënë vend revanshit dhe vazhdimit të diskriminimit të të drejtave tona". Bedri Blloshmi, vëllai i poetit të pushkatuar nga regjimi komunist, Vilson Blloshmi, tha në emër të ish të persekutuarëve se "ne i njohim persekutorët tanë dhe i dimë krimet që kanë kryer, sepse jemi ende gjallë dhe asnjë vendim i standardeve të sigurimit të shtetit nuk do të na ndalë të bëjmë zbardhjen e krimeve të tyre". |
||||
Copyright © 2005-2008 Nulled by [x-MoBiLe]. All rights reserved. |