RTK - Lëvizja Vetëvendosje ka ngritur kallëzim penal kundër 116 pjesëtarëve të komunitetit serb në Prokurorinë e Qarkut në Prishtinë. Sipas liderit të të lëvizjes Albin Kurti, këta persona që përfaqësojnë strukturat paralele të Serbisë në Kosovës, kanë punuar në vazhdimësi në forcimin e shtetit paralel serb, janë marr vesh për të kryer, apo nxitur shumë vepra penale, për të cilat ligji parasheh së paku 5 vjet burgim. Në krye të listës figuron Goran Bogdanoviç, ministër për Kosovën në qeverinë serbe. Djegia e pikave doganore më 19 shkurt në kufirin e Kosovës me Serbinë, hyrja në gjykatën në veri të Mitrovicës më 14 mars, vrasja e policit ukrainas më 17 mars të vitit të kaluar, janë "disa nga krimet e strukturave paralele të Serbisë që nga shpallja e pavarsisë së Kosovës", e që vazhdojnë edhe këtë vit, nënvizon "Vetëvendosje". 

Evropa e Lirë - Disa qindra njerëz kanë protestuar në Shqipëri kundër mënyrës se si qeveria e trajtoi shpërthimin e depove të municionit në Gërdec.
Protestat paqësore u organizuan në Tiranë nga Partia Socialiste në opozitë, e cila akuzon qeverinë për korrupcion gjatë asgjësimit të municionit.
Në 15 mars, 2008, 26 njerëz e humbën jetën nga shpërthimet në Gërdec, 302 vetë u plagosën ndërsa u shkatërruan apo dëmtuan 5.500 shtëpi.
Ministri i atëhershëm i mbrojtjes, Fatmir Mejdiu, ish shefi i armatës, Luan Hoxha, dhe 26 zyrtarë të tjerë janë akuzuar për ndërlidhje me shpërthimin, ndërsa tre vetë janë akuzuar për vrasje. Voal-online.

BBC - Në prag të njëvjetorit të tragjedisë së Gërdecit familjarët e viktimave organizuan një tubim në perkujtim të ngjarjes që mori jetën e 26 personave. Familjarët e viktimave të tragjedisë së Gërdecit përkujtuan ngjarjen e rëndë të një viti më parë me një tubim të heshtur në vendin ku ndodhi shpërthimi. Tufa me lule dhe qirinj u vendosën pranë kraterit të Gërdecit nga të afërmit e 26 personave, që gjetën vdekjen nga shpërthimi në një punishte të çmontimit të municioneve më 15 marsit 2008. Manifestimit të banorëve të Gërdecit iu bashkuan edhe përfaqësuesit e lëvizjes "Mjaft" dhe organizatave të tjera jopolitike. Partitë politike të opozitës kanë paralajmëruar protesta gjatë ditës së djelë. Përfaqësues të PS, G99-s, LSI si dhe organizata të tjera jo qeveritare pritet të protestojnë kundër qeverisë, të cilën ato e konsiderojne përgjegjëse për tragjedinë.

Voal-online – Me elbasanasit do të jetë sot edhe kryeministri i vendit Sali Berisha. Si çdo vit, më 14 mars, Elbasani është kryeqyteti i shqiptarëve. Është një traditë të cilën po e ripërtërin edhe Tirana dhe anët e tjera të Shqipërisë e të hapësirave shqiptare në përgjithësi. Veprimtaria më e spikatur e ditës së sotme në Tiranë pritet të jetë “Rock the Bllok”, verpimtari muzikore në zonën e Bllokut, mjedisi më luksoz i kryeqytetit të Shqipërisë. Festimet fillojnë në në sheshin "Skënderbej", bulevardin "Dëshmorët e Kombit", sheshin "Nënë Tereza" si dhe përqëndrohen në zonën e Bllokut, ku jetonte Byroja Politike dikur, ndërsa tani më të kamurit. Hapje në sheshin "Skënderbej", e bën Ansambli Tirana, ndërsa banda e qytetit do të fillojë rrugëtimin në bulevardin "Dëshmorët e Kombit". 

Voal-online – Bëhet e ditur se Presidenti i SHBA Barak Obama i ka dërguar letër falënderimi Kryeministrit shqiptar Sali Berisha. Është përgjigja e falenderimit ndaj mesazhit të urimit të dërguar nga Berisha me rastin e përurimit të President i SHBA-ve. Obama fton kryeministrin shqiptar për bashkëpunim mes dy vendeve në kuadër të ndërtimit të një bote më të sigurt. Në letrën e tij Presidenti amerikan shkruan: “I dashur zoti Kryeministër! Ju falënderoj për mesazhin tuaj të njerëzishëm të urimit me rastin e inagurimit tim. Me marrjen e detyrës dhe të përgjegjësive si President i Shteteve të Bashkuara të Amerikës, unë çmoj shumë fjalët tuaja të inkurajimit. Unë pres me padurim të punojmë së bashku nën frymën e miqësisë dhe paqes për të ndërtuar një botë më të sigurt gjatë 4 viteve të ardhshme. Sinqerisht juaji, Barak Obama.”