Voal-online – Procesi i parë gjyqësor i Euleksit në veriun e Mitrovicës, i parashikuar për sot paradite, nuk është lejuar nga serbë të kësaj pjese të Kosovës, të cilët kanë bllokuar hyrjen e ndërtesës ku Euleksi do ta zhvillonte procesin. Serbët protestues janë kundër përdorimit të vulës ku është shkruar „Republika e Kosovës“. Kemi të bëjmë kështu me një tjetër veprim të nxitur nga Beogradi, gjithnjë e më agresiv në përdorimin e serbëve në veriun e Kosovës për t’iu kundërvënë, gjithnjë e më haptas dhe më brutalisht Kosovës së pavarur dhe sovrane. Sot gjithsesi vihet në provë premtimi i Euleksit se do ta shtrijë funksionimin e shtetit ligjor në gjithë territorin e Kosovës dhe do ta bëjë kështu të mundur funksionimin e shtetit të pavarur dhe sovran të Kosovës. Do të vihet në provë serioziteti dhe vendosmëria e Euleksit për t’iu kundërvënë strukturave gjithnjë e më të sofistikuara kriminale të Beogradit në Kosovë.

Një zëdhënës i Sekretares së Shtetit Hillari Klinton tha se SHBA do të japin 900 milionë dollarë ndihma për palestinezët në konferencën e sotme, 300 milionë prej të cilave në formën e ndihmave për Rripin e Gazës. Të 6 vendet anëtare të Këshillit të Bashkëpunimit të Gjirit thanë dje se do të japin bashkarisht 1, 65 miliardë dollarë ndihma. Autoriteti Palestinez ka thënë se i duhen 2,8 miliardë dollarë për rindërtimin e Gazës. Zëdhënësi i zonjës Klinton tha se 600 milionë dollarë nga ndihma amerikane do t’i jepen Autoritetit Palestinez, për të mbuluar mungesat në buxhet, reformat institucionale dhe zhvillimin ekonomik. 

Voal-online – Agjencia italiane e lajmeve ANSA bën të ditur se një grua shqiptare dhe dy fëmijët e saj, një katërmbëdhjetë vjeçe dhe një trembëdhjetë vjeç, kanë vdekur sot në mëngjes për shkak të një shpërthimi që ka ndodhur në një vilë në Barberino të Muxhelos (Mugello), Firence. Është plagosur rëndë një fqinj, 38 vjeç, italian. Shpërthimi është verifikuar në orën 8:15 në rrugën Garibaldi, duke bërë të binte soletën e ndërtesës.

Midis shkaqeve të mundshme ekziston hamendja se mund të ketë pasë një rrjedhje gazi nga një stufë e ushqyer me metan, rënë në rrugë dhe që mund të ketë qenë në banesën e të plagosurit. Ky i fundit, në vijim të shpërthimit, është gjuajtur jashtë banesës, e cila ndodhej në katin e poshtëm. Tani është në spitalin e Karexhit (Careggi) në Firence. Ka marrë plagë në pjesën më të madhe të trupit, gjendja e tij është e rëndë.

Voal-online - Kryeministri i Republikës së Kosovës, Hashim Thaçi tha se në veri të Mitrovicës nuk do të ketë vend për kontrabandistë dhe se ligjshmëria do të shtrihet në të gjithë vendin. Këtë konstatim kryeministri Thaçi e bëri për Zërin e Amerikës, pas takimeve që zhvilloi në Uashington së bashku me presidentin Sejdiu me zyrtarë të lartë amerikanë.

Kosova ka prodhuar stabilitet, jo vetëm për veten, por edhe për rajonin, por mendojmë se reduktimi i trupave të NATO-s duhet të shkojë paralelisht me ndërtimin e Forcës së Sigurisë së Kosovës, ka thënë zv/kryeministri Hajredin Kuçi, duke komentuar paralajmërimet e komandantit të KFOR-it për mundësinë e reduktimit të misionit. Sipas Kuçit, përfundimi i mandatit të KFOR-it duhet të jetë në përputhje edhe me integrimin e Kosovës në NATO.

Voal-online – Dje, të enjten, nënpresidenti i Shteteve të Bashkuara të Amerikës Joe Biden priti delegacionin e Kosovës, në përbërje të të cilit janë Presidenti i Kosovës Fatmir Sejdiu, kryeministri i Kosovës Hashim Thaçi dhe Ministri i Jashtëm i Kosovës Skënder Hyseni. Nënpresidenti Biden, një mik i shquar i Kosovës, rikonfirmoi gjatë pritjes mbështetjen e SHBA-ve për Kosovën.

QIK - Gjykata e Tribunalit Hagës për krime të luftës në ish Jugosllavi ka dhënë sot verdiktin në rastin e ish presidentit të Serbisë, Milan Milutinoviq dhe pesë zyrtarëve të tjerë të lartë serbë për krime lufte dhe krime kundër njerëzimit gjatë luftës në Kosovë. Gjykata ka shpallë të pafajshëm Milutinoviqin dhe ka dënuar pesë të tjerë zyrtarët të tjerë serbë me burgim shumëvjeçar. Zëvendëskryeministri jugosllav, Nikolla Shainoviq, është dënuar me 22 vjet burgim; Dragolub Ojdaniq, ish shef i Shtatmadhorisë së ushtrisë jugosllave, është dënuar me 15 vjet burgim, gjenerali i ushtrisë Nebojsha Pavkoviq është dënuar me 22 vjet burgim, kurse gjenerali tjetër Vlladimir Llazareviq me 15 vjet burgim. Ndërkaq gjenerali i policisë Sreten Llukiq ëshët dënuar me 22 vjet burgim. Millan Millutinvoviqi dhe pesë zyrtarë të tjerë të lartë serbë, janë akuzuar për zhvendosje të dhunshme, deportime, vrasje dhe përndjekje të shqiptarëve të Kosovës. Ky është verdikti i parë lidhur me krimet e kryera nga forcat serbe në Kosovë gjatë luftës. Akuzat ishin përqëndruar në fushatën e terrorit dhe dhunës, përfshirë këtu edhe dëbimin e rreth 800 mijë shqiptarëve nga Kosova.