Pak ditë më parë në shtypin shqiptar lexova se, me rastin e Festës së Kurban - Bajramit, një grua në profesion - mbledhje kanoçesh, së bashku me familje, kishin ngrënë drekë pa u ftuar në një nga lokalet e Tiranës. Dreka e bollshme, ishte shtruar nga Bashkia e Tiranës për njerëzit me të ardhura të pakta financiare. Gruaja në fjalë me të dëgjuar këtë sihariq të madh, vuri përpara burrin e fëmijët, e i u drejtua lokalit. Megjithëse ishte e ndërgjegjshme se emrat e tyre nuk figuronin në listën fantazmë, përsëri zuri vend për të ngrënë një çapë - bukë përsëmbari si gjithë dynjaja. Gëzohej nëna e gjorë, tek shikonte fëmijët që të kënaqur shijonin drekën më të mirë të botës, e që kurrë nuk kishin patur rast ta hanin në shtëpinë e tyre. Ndihej e lumtur edhe pse kishin hyrë ashtu pa ftuar, krenare e me lugë në brez që së bashku me familje i ishte drejtuar lokalit ku mbahej dreka për të varfërit e Kryeqytetit. Ç'të keqe kishte, fundja pse ajo duhej të veçohej nga të tjerët, ndërkohë që i plotësonte të gjitha kushtet e varfërisë. E duke thyer këtë rregull - tabu, hante e gëzuar bashkë me fëmijë gatimet më speciale për Festën e Kurban - Bajramit.
Shumë mirë kishte vepruar, faji ishte i atyre që nuk kishin shkruar emrin e saj në listë.
Gjatë leximit, vura re se, e vogël kishte pasë qenë ajo drekë, më madhështore duhej të mbahej. Atje në Sheshin "Skënderbe" duhej të shtrohej, ku çadrat për grevën e dështuar të urisë kishte ngritur Edi Rama. Atje ku dikur me urdhër partie edhe tankset parakalonin, e partitë sot pushtetin e karriget kërkojnë. Sa mirë votën e popullit fukara e duan, e të dalë në shesh për mbështetje e protesta. A pyet vallë kush, nëse ka ky njeri bukë sonte në shtëpi për ti vënë përpara fëmijës së tij. Apo vetëm për llukset e tyre mendojnë, kush e kush nga pasanikët e rinj, të ndërtojë vilën më të bukur, e të ngrejë gradaçelën më të lartë, ndërsa për popullin e varfër nuk pyesin fare.
Eshtë e vërtetë që shumë emra ineresantë i janë shtuar vargut të gjatë të partive politike nëpër botë si: Partia e Piratëve që është në Suedi, Partia e Surprizës, Partia e Moderne Vige, Partia e Armëve dhe e Drogës, etj, si dhe "Partia e Çajit", e cila zhvillon veprimtari të suksesshme në Shtetet e Bashkuara të Amerikës. Rreth saj janë rregjistruar rreth 7 mijë anëtarë, e që së fundi ka patur mbështetje nga emra të njohur të politikës amerikane si John MCcain, e Sarah Palin. Duke u nisur nga gjithë këto ngjarje të rëndësishme, që kanë tronditur globin mbarë, pse mos të ligjërohet edhe në Shqipëri një parti me emër krejt të veçantë, p.sh "Partia e Kanoçeve". Mendoj se e meritojmë një parti të tillë, pasi ne renditemi në listën e vendeve që kanë standart të ulët jetese. Kam besim, se kjo lëvizje ka për të ecur jashtëzakonisht mirë, pasi do të gjejë përkrahje edhe në masën e gjerë të popullit, si brenda ashtu edhe jashtë. E në zgjedhjet e ardhshme mund të fitojë bindshëm, e të kapë shumë vende në Parlament.
Comments (0)
Dërgoja shokut
Printo
