Për ironi të fatit, Chris Stevens, ambasadori amerikan në Libi do të humbiste
jetën në datën 11 shtator 2012, pikërisht në qytetin të cilin ai e çliroi afro
një vit më parë. Pakënaqësi? Mosmirënjohje? Urrejtje ndaj atyre që i çliruan?
Ndryshim politik ndaj të huajve?
Të gjitha mund të jenë të vërteta, sidoqoftë Sekretarja Amerikane e Shtetit
Helleri Klinton thkson se sulmi është organizuar nga një grup i vogël
ekstremistësh. Sidoqoftë, mediat në të gjithë botën, kanë treguar me gisht
filmin "Innocence of Muslims" të autorit Sam Bacile që e ka ndezur keq Lindjen
e Mesme sidomos Egjiptin dhe Libinë ku veç te tjerëve u vranë 4 amerikanë ndër
ta edhe ambasadori Stavens. Filmi që sipas autori ka dashur të denoncojë
"kancerin e Islamit" është konsideruar nga myslimanët në Lindjen e Mesme si
provokues, fyes e ofendues për besimtarët pasi në film hidhet baltë mbi profetin
Muhamet.
Le të kujtojmë se prekja e simbolit të profetit është e papranueshme për
besimtarët myslimanë. Veprime të tilla si karikaturat e profetit Muhamet në
Danimarkë në vitin 2005, djegia e Kuranit me nismën e një prifti (Terry Jones)
në Florida në vitin 2010, kanë shkaktuar tensione mes besimtarëve myslimanë dhe
amerikanëve që janë kthyer në konfrontime të dhunëshme.
Ndonëse thuhet se filmi "Innocence of Muslims" po denoncohet si nxitës i dhunës
së këtyre ditëve, ndoshta edhe lojëra politike me qëllime të largëta me efekte
në Lindjen e Mesme apo edhe në Shtetet e Bashkuara mund të mendohet. Në Lindjen
e Mesme mund të mendohet forcimi i lëvizjeve ekstremiste islamiste që duan të
forcojnë pozitat e tyre në vendet që u përfshinë në "Pranverën Arabe". Nga ana
tjetër, në Shtetet e Bashkuara ngelen veç dy muaj nga zgjedhjet presidenciale
dhe ato të përfaqësuesve legjislative. Kush do të përfitojë nga kjo dhunë? Nga
dhuna nuk fiton askush ... përveç ndonjë politkani ...Koha ndoshta do ta tregojë se
kush.
Montreal, 12 shtator 2012.