VOAL - Online Zëri i Shqiptarëve | ||||
E DREJTA E TRUQISË PËR VETËMBROJTJE Nga SHABAN MURATI E Martë, 11.27.2012, 07:48am (GMT1)
Është një hap i Moskës, i cili nuk mund të mos shkaktojë habi për qëllimet,
adresën dhe kohën në të cilën ndërmerret kjo protestë. Habia e parë është se
çfarë kërkon dhe përse duhet të shqetësohet Rusia nga një veprim mbrojtës i
planifikuar nga Turqia për t'u realizuar në tokën turke, për të mbrojtur
territorin kombëtar dhe popullin e vet. Nuk ka asnjë arsye të shqetësohet Rusia
as nga NATO, e cila planifikon një veprim për të mbrojtur një shtet anëtar të
aleancës, territori dhe kufijtë e të cilit janë gjithashtu territor atlantik
dhe kufij atlantikë. Edhe nëse sistemet e mbrojtjes ajrore atlantike do të
vendoseshin në kufijtë veriorë të Turqisë, ajo do të përbënte një çështje të
brendshme të shtetit turk. Vendosja e sistemit të raketave atlantike në kufirin
jugor të Turqisë e bën më absurde protestën e Rusisë, sepse Turqia është brenda
së drejtës së saj juridike, kombëtare dhe ndërkombëtare, për të marrë masat
përkatëse të mbrojtjes së vendit dhe të popullit të vet. Së dyti, nga pikëpamja
ushtarake, raketat "Patriot" në përbërje të sistemit të mbrojtjes
ajrore atlantike, e kanë rrezen e tyre 100 milje, dhe mjafton të shohësh një
hartë shkollore për të mësuar se janë shumë larg formimit të ndonjë rreziku për
territorin dhe për popullin rus. Së treti, marrëveshjet e njëpasnjëshme kohët e
fundit të Rusisë me shtetet që dolën nga ish-Bashkimi Sovjetik, si Ukraina,
Taxhikistani, Kirgizstani dhe Armenia, për të zgjatur me 30 vjet praninë e
bazave dhe të forcave ushtarake ruse në territoret e atyre shteteve, janë shumë
më kërcënuese për Turqinë dhe për NATO-n, po të kemi parasysh se baza dhe
forcat ushtarake ruse në Armeni janë dislokuar shumë pranë kufirit të këtij
shteti me Turqinë.
E drejta e Turqisë për vetëmbrojtje buron nga kërcënimet dhe rreziqet, që po
përshkallëzohen për shkak të politikës kriminale të regjimit të Asadit në Siri,
i cili po përpiqet që të gjejë një farë lehtësimi, duke intensifikuar
provokacionet ndaj shteteve fqinje dhe për ta ndërkombëtarizuar konfliktin që
regjimi ka me popullin e vet. Në verë forcat ajrore siriane rrëzuan një avion
ushtarak turk në ujërat ndërkombëtare dhe gjatë muajit të kaluar artileria
qeveritare bombardoi brenda territorit turk, duke vrarë disa shtetas turq.
Regjimi sirian, sipas mediave botërore, disponon një nga stoqet më të mëdha në
botë të armëve kimike, bashkë me sistemet përkatëse të lëshimit të tyre, sisteme
të furnizuara nga Rusia. Në një situatë të tillë, është krejt e natyrshme, që
qeveria dhe ushtria turke të ndërmarrin masa të sigurimit dhe të përballimit të
rreziqeve të papritura, që mund të shkaktojë aventurizmi dhe disekuilibri i një
regjimi autokratik, që po fundoset. Kryeministri i Turqisë, Rexhep Taip
Erdogan, me të drejtë deklaroi në 22 nëntor se planet e Turqisë për forcimin e
mbrojtjes nuk i takojnë Rusisë, se reagimi i Moskës është shumë i gabuar dhe
kjo përbën një ndërhyrje në punët e brendshme të Turqisë. Edhe sekretari i
përgjithshëm i NATO-s, Rasmusen, në 22 nëntor, deklaroi se reagimi i Rusisë
është pa baza dhe se NATO do të bëjë gjithçka për të mbrojtur aleatin tonë,
Turqinë, gjë që është në të njëjtën kohë sigurim i kufijve tanë të Jugut.
Brenda së drejtës së Turqisë për vetëmbrojtje është edhe e drejta e
planifikimit dhe e pjesëmarrjes së NATO-s në mbrojtje të një shteti anëtar.
Kufijtë e Turqisë janë kufij të NATO-s, ashtu siç janë të gjithë kufijtë e çdo
shteti anëtar, dhe ka një detyrim, që rrjedh nga Traktati themelues i NATO-s,
sipas të cilit e gjithë aleanca ndihmon secilin shtet anëtar, që kërcënohet nga
rreziqet e ardhura nga një shtet fqinj. Ndaj, edhe sekretari i përgjithshëm i
NATO-s, edhe sekretari amerikan i Mbrojtjes, edhe ministri i Jashtëm gjerman,
dhe ministri i Jashtëm francez, njëri pas tjetrit shprehën mbështetje për
kërkesën turke të mbrojtjes ajrore, dhe gatishmërinë për të konkretizuar
solidaritetin me aleatin e rëndësishëm të NATO-s.
Protesta e Rusisë bëhet edhe më e pakuptueshme, po të mbahet parasysh se nuk
është hera e parë që NATO dislokon sistemin e saj të raketave
"Patriot" në Turqi, për mbrojtjen e hapësirës ajrore turke. Edhe në
vitin 1991, edhe në vitin 2003, në të dyja rastet e luftërave të Gjirit kundër
regjimit autokrat të Sadam Hyseinit në Irak, NATO dislokoi në Turqi sistemet e
raketave, të cilat u larguan pas kryerjes së misionit të tyre. Nëse në planin
ushtarak dhe strategjik, ridislokimi përsëri i sistemit të raketave
"Patriot" në Turqi nuk paraqet ndonjë kërcënim për Rusinë, është e
nevojshme të shqyrtohet në planin diplomatik, motivi që e shtyn Kremlinin të
krijojë një valë tensionesh ndërkombëtare për hatër të regjimit sirian të
Asadit. Është e njohur se regjimi i Damaskut është i vetmi aleat arab i Rusisë,
se Rusia ka në Siri të vetmen bazë të saj ushtarako-detare në detin Mesdhe, se
Rusia ka vënë veton tre herë kundër rezolutave të Këshillit të Sigurimit të
OKB-së për sanksione ndaj regjimit të Asadit, se Rusia vazhdon furnizimet me
armë të rënda për regjimin e Damaskut, armë me të cilat ai regjim po masakron
prej 20 muajsh popullin e vet. Duke parë rrëshqitjen e regjimit sirian drejt
fundit, Kremlini synon të krijojë probleme të karakterit ndërkombëtar, duke
hyrë edhe vetë në krizën dhe në situatën e tensionuar rajonale, që ka prodhuar
kriza siriane.
Duke analizuar ndërhyrjen provokuese të Moskës në punët e brendshme të Turqisë
dhe të NATO-s, nuk mund të mos ndalesh në nevojën e vendosjes në një peshore
strategjike të marrëdhënieve të Rusisë me Turqinë dhe të marrëdhënieve të
Rusisë me Sirinë. Në çdo këndshikim të ftohtë strategjik, qoftë nga pikëpamja
ruse, qoftë nga pikëpamja atlantike apo rajonale, Rusia duhet të ketë interes
më të madh për marrëdhënie të qëndrueshme dhe miqësore me Turqinë, më shumë se
sa me Sirinë. Rusia e ka të freskët përvojën e saj të hidhur të dështimit me
politikat e mbështetjes për regjimet e autokratëve të tjerë arabë, që nga Sadam
Hyseini, e deri tek Muamer Gadafi, dhe diplomacia ruse duhet ta ketë kuptuar se
bastet strategjike nuk mund të vihen me regjime si ai i Bashar Al Asadit.
Karrigia e Asadit nuk mund të paguhet me koston e prishjes së marrëdhënieve me
Turqinë dhe me NATO-n.
Ajo që e bën më të pakuptueshme protestën ruse, është fakti se Moska ka
shpallur prej disa kohësh qëndrimin e saj për aleancë dhe partneritet
strategjik energjetik të Rusisë me Turqinë. Në këtë kuadër, edhe projekti i saj
më i rëndësishëm energjetik, i gazsjellësit "South Stream", që do të
furnizojë Europën me gaz rus, dhe që nis nga ndërtimi në 7 dhjetor, u bë i
mundur pas marrëveshjes që nënshkroi Rusia me Turqinë, për kalimin e
tubacioneve të gazsjellësit në ujërat e zonës ekonomike ekskluzive të Turqisë
në Detin e Zi. Nga ana tjetër, protesta tensionuese ruse ndërmerret në një kohë
kur në 3 dhjetor është planifikuar një vizitë në Stamboll e presidentit
Vladimir Putin dhe në 4 dhjetor është planifikuar mbledhja e Këshillit
NATO-Rusi në nivelin e ministrave të Jashtëm. Ndaj duket e pakuptueshme se
çfarë interesi rus ka që të krijohet një klimë e papërshtatshme diplomatike me
protestat ndaj të drejtës së Turqisë për vetëmbrojtje dhe të drejtës së NATO-s
për të mbrojtur një shtet anëtar.
Acarimi i marrëdhënieve, qoftë me Turqinë, qoftë me NATO-n, nuk duket se mund
të sjellë ndonjë përfitim diplomatik, politik apo strategjik, me përjashtim të
dhënies së një sadisfaksioni të përkohshëm moral për regjimin e Asadit, i cili
gjithashtu e sulmoi planin e Turqisë dhe të NATO-s për mbrojtjen ajrore. Në
fakt protesta ruse ndaj Turqisë dhe ndaj NATO-s shpreh një konfuzion të qarqeve
drejtuese në Moskë, të cilët ende lëkunden midis racionalizmit të nevojës së
marrëdhënieve të mira me Turqinë dhe me NATO-n, dhe ambicies për të marrë një
rol të ri në rajonin e Lindjes së Mesme, duke acaruar situatat. Diplomacia ruse
me sa duket ende vazhdon të jetë e mbërthyer pas metodës së saj të vjetër, që
nëpërmjet provokimit të tensioneve, ajo të bëhet edhe më e pranishme, edhe më
vendimmarrëse. Është një strategji, që ushqehet nga ëndrra e rikthimit të
staturës dhe ndikimit të ish-Bashkimit të dikurshëm Sovjetik në ato rajone, gjë
përtej mundësisë së ringjalljes. Zhvillimet pozitive në marrëdhëniet ndërkombëtare dhe stabiliteti i rajonit të Lindjes së Mesme, të pellgut të Detit Mesdhe dhe të Kaukazit, diktojnë marrëdhënie të mira dhe bashkëpunim të ngushtë midis Rusisë dhe Turqisë dhe midis Rusisë dhe NATO-s. Kjo do të ndihmonte realisht edhe në kapërcimin e krizës siriane, por dhe në çtensionimin e situatave në rajonet e përmendura. Sindroma e vjetër ruse e kundërvënies aprioristike ndaj NATO-s dhe shteteve të NATO-s duhet t'i përkasë së kaluarës. SHABAN MURATI
|
||||
Copyright © 2005-2008 Nulled by [x-MoBiLe]. All rights reserved. |