VOAL - Online Zëri i Shqiptarëve

KUR T'I NDËRSEJNË ANALFABETËT! Nga GANI MEHMETAJ E Enjte, 07.17.2014, 02:47pm (GMT1) Reagim ndaj shkrimit: "Njerëzit e fshehur në "istikame" po e sulmojnë LDK-në", botuar në gazetën "Bota press" me datën 16.07. 2014. . Aksionari kryesor i LDK-së, S. Hamiti ma ndërseu argatin e vet të dëgjueshëm L. Hazirin, gjysmëanalfabetin me zemër lepuri, sa për të më fyer: E di padrinoja që Hazir shkreta nuk di ta rreshtojë asnjë fjali, sepse nuk di të shkruajë shqip, e di shefi i tij që Hazir- mulla edhe kur i thotë përmendesh ato që ia kanë shkruar, belbëzon si nxënësi i dobët i fillores, apo nis e djersinë si vëllezërit e tij - zurlaxhi nëpër dasma. Mirëpo, askush nga LDK-ja e S. Hamitit nuk e ka zellin e mejtepliut të Gjilanit për të shërbyer herë SHIK-ut, herë padrinos së LDK-së, sepse të dy palët të një krahu politik e biznesor janë. PDK-ja e S. Hamiti ia falen Gjilanin, mbase do t'ia shohin hajrin me tender e me biznese, por kam frikë se qyteti e katundet do t'ia shoh sherrin, ashtu sikurse kanë nis t'ia shohin sherrin intelektualët e këtij regjioni. Emrat e kumbueshëm të intelektualëve të qytetit i zëvendësoi me islamike me shamia. Por sherrin mund t'ia shoh e tërë Kosova. Kush më thotë se paskam qenë në "istikame"? Luta i kafehaneve të Gjilanit, ku ishte inventar i përhershëm, derisa u bë banorë i Prishtinës, apo ish-shitësi i kasetave me këngë turko-arabe, matrapazi që herë i lavdëron beduinët e shkretëtirës, herë perëndimorët, varësisht kush i jep më shumë llokume. Unë isha në "istikame" derisa L. Haziri luftonte fyt e m'fyt me qoftet e qebaptorëve të Gjilanit e "shlivovicën" e Serbisë. Unë mbrohesha në istikame derisa Luta i S. Hamitit hante dreka e darka me Kadri Veselin, ndërsa shefi i tij Hamiti e pinte kafen e mëngjesit me kreun tjetër të PDK-së në Prishtinë. "Unë kurrë s'kam pi kafe me Kadri Veselin, ndërsa ti haje dreka e darka me të," i pati thënë Fatmir Limaj në Kuvendin e Kosovës Lutfi Hazirit, kur mbledhja transmetohej para miliona shikuesve. Luta i shkretë, i tha vetës: "hapu tokë, pse fola!", e futi kokën në mes të shalëve, ashtu sikurse bënë edhe S.Hamiti e I.Beqiri kur ua përmendi turpet Hashim Thaçi. Luta që i pronësoi postet me paratë e videokasetave dhe bizneseve me këngë turko-arabe, me akuzon mua, njërin ndër themeluesit e LDK-së, kinse jam fshehur në istikame, ndërsa jam ndër ata që më së shumti jam angazhuar për pavarësinë e Kosovës, në kohën kur të shkallmonin dru apo të vrisnin policët e Milosheviqit, ndërsa Luta atëbotë bënte tregti me Serbinë. Gabimi im i pafalshëm, por edhe gabimi i disa intelektualëve të tjerë ishte pse nuk u inkuadruam në strukturat udhëheqëse të LDK-së, megjithëse na ftonte Rugova. Ne mendonin se mund të kontribuonim më shumë në sensibilizimin e çështjes shqiptare me shkrime e me botimin e gazetave. Botonim shkrime në anglisht, frëngjisht e në gjermanisht në Perëndim për masakrat serbe në Kosovë, e informuam botën për fatkeqësinë tonë, derisa Luta vazhdonte të tregtonte me Beogradin. Gabimi im dhe i intelektualëve të tjerë ishte pse lejuam që LDK-në ta pushtojnë heshtazi urithët, matrapazët dhe ata që synim e kishin përfitimin e jo idealet. Gabimi ynë ishte pse nuk ua treguam vendin me kohë matrapazëve, të pakurrizorëve, analfabetëve e dhunuesve, ndërsa tash s'ke si i pengon, sepse janë shumëzuar si brejtësit nëpër ara dhe janë bërë të fortë e të rrezikshëm me aleancat e nëndheshme. Por kur e mendoj më mirë, e di ne nuk gabuam, jo pse nuk i parashikuam gjërat, por sepse intelektualët, gazetarët me emër dhe shkrimtarët i vrisnin, i torturonin natën pa hënë, ose i kërcënonin me familje para dhe pas luftës, në të njëjtën mënyrë, vetëm gjuha ndryshonte. Porosia ishte e qartë po u bëre pjesë e strukturave të LDK-së të gjen e liga. Atëbotë e ndjeja, por tash po e shoh qartë se edhe Serbia, edhe grupet kriminale ishin të interesuara që kreun e LDK-së ta pushtonin grupet e tilla si Hamiti, Haziri, Beqiri- pakurrizorë, e jo intelektualët me ideale. Pjellë e kësaj lufte të pisët të Serbisë e të grupeve kriminale që i luftuan apo i vranë intelektualët e LDK-së janë situatat kur kryetari, pedagog universitar do të zëvendësohet me mejtepli, apo kur elita e kombit, zëvendësohet me ismetbeqira, lutfihazira, sabrihamita etj. Turp më të madh për shqiptarët në përgjithësi e rugovistët në veçanti nuk ka. Çka t'i them Ismetit të Kodrës së Trimave që e fëlliqi Prishtinën me qeverisjen e tij të keqe, ndërsa në Sheshin "Nëna Terezë " ende kundërmon era e kanalizimit të vënë keq nga fituesi i tenderit të tij. Nga L. Haziri e I. Beqiri e kam pritë një reagim të tillë, ata s'kanë çare se u hakërrohet Hamiti sa mund ta dëgjojnë edhe rrugëve përreth selisë së LDK-së, por ata nuk e përgënjeshtruan asnjë vlerësim timin, vetëm e mohuan në stilin e hajdutit: "pasha kryet e nanës unë nuk kam vjedhë"! Por ti, miku im, Haki Rugova, ç'pate? Fortë për se ngushti të paskan shti, more burrë. Prishtinë, 16 korrik 2014 GANI MEHMETAJ

Copyright © 2005-2008 Nulled by [x-MoBiLe]. All rights reserved.