Voal-online - Me motivacionin për kontribut të shquar në luftën për çlirimin e Kosovës dhe fitoren e pavarësisë së saj, kryetari i Bashkisë së Gjirokastrës Flamur Bime në një ceremoni të veçantë të organizuar enkas me këtë rast, i ka dorëzuar ish kryeministrit të Kosovës Ramush Haradinaj titullin qytetar nderi. Bime tha se përpjekjet e Haradinajt në luftën për çlirimin e Kosovës janë mjaft të rëndësishme, çka ka bërë që figura e tij të mbetet në memorien e çdo shqiptari, për shkak të kontributit me vlerë që ai ka dhënë për Kosovën.
Ky nderim është zhvilluar gjatë një vizite të Ramush Haradinaj në qytetin e Gjirokastrës, ku vetë ky i fundit e ka cilësuar këtë ditë si të shënuar në jetën e tij.
"Nderimin që më bëhet mua sot" - ka theksuar Haradinaj "po e marr si një investim të përbashkët për atë çka do të ndërtojmë në të ardhmen". Haradinaj e ka cilësuar këtë titull si një nderim ndaj të gjithë pjesëmarrëse te UÇK-se dhe vet popullit te Kosovës. Ai ka falënderuar autoritetet e Gjirokastrës dhe ka ofruar mundësi bashkëpunimi mes këtij qyteti dhe qyteteve të Kosovës.