ATSH/.- Ministri i Punëve të Jashtme, Lulzim Basha, vlerësoi të mërkurën, gjatë takimit me  Ambasadorin e Mbretërisë së Arabisë Saudite në Tiranë, z.  Abdullah Abdulazis Al-Abdulkarim, se njohja e pavarësisë së Kosovës nga Arabia Saudite është dëshmi e marrëdhënieve të shkëlqyera midis të të vendeve.  Zyra e shtypit e MPJ-së bëri të ditur se ministri Basha përshëndeti në këtë takim nivelin e shkëlqyer të marrëdhënieve mes dy vendeve. 
     Duke shprehur mirënjohjen e thellë të popullit shqiptar për Mbretin dhe popullin saudit për vendimin e marrë për njohjen e Republikës së Kosovës si shtet sovran e i pavarur, ministri Basha theksoi se kjo është një "dëshmi e qartë e miqësisë dhe marrëdhënieve të shkëlqyera që ekzistojnë ndërmjet dy popujve dhe vendeve tona, i cili u përjetua me mjaft entuziazëm, si në Kosovë ashtu edhe në Shqipëri".
     Një vend të rëndësishëm në bisedë zunë dhe rezultatet e vizitës së suksesshme të ministrit Basha në Mbretërinë e Arabisë Saudite
     Ambasadori saudit i dorëzoi me këtë rast ministrit Basha një mesazh të ngrohtë dhe tepër miqësor të Lartësisë së Tij, Princit Saud Al Faisal, në të cilën vihet ne dukje se mikpritja që iu rezervua delegacionit shqiptar, ishte një dëshmi e  frymës së miqësisë tradicionale mes dy vendeve. 
     Në mesazh theksohet gjithashtu, besimi i palës saudite se bashkëpunimi i shkëlqyer dypalësh, që ekziston aktualisht, do të përfshijë koordinimin dhe mbështetjen e vazhdueshme të dy vendeve edhe në kuadrin e organizmave ndërkombëtare.