30 dhjetor (Voal-online) Burimet nga presidenca bënë të ditur se Presidenti i Republikës Bamir Topi dekretoi shpalljen e ligjit nr. 10 019, datë 29.12.2008 "Kodi Zgjedhor i Republikës së Shqipërisë". Kodi i ri Zgjedhor u votua dje në mesditë me 116 vota pro, duke i hapur rrugë përfundimisht ligjit të parapëlqyer me bashkëpajtim nga Partia Socialiste dhe Partia Demokratike. Ishin të pranishëm në seancën plenare 121 deputetë ndër 140 që janë mandatuar në Kuvend. Për Kodin e ri Zgjedhor votuan 116, kurse tre ishin kundër. U regjistrua një abstenim, kurse një tjetër, nuk mori pjesë në votim. Arjan Madhi i parapriu votimi duke folur në emër të komisionit të posaçëm zgjedhor, si relator i projektligjit: "Komisioni u njoh me arsyet e kthimit të projektligjit nga Presidenti, i cili shihte pamundësi juridike dhe kushtetuese për dekretimin e datës së zgjedhjeve, zgjidhja u gjet tek miratimi i një dispozite tranzitore që i hap rrugën caktimit të datës së zgjedhjeve parlamentare 2009 nga kryetari i Shtetit", - tha ai. Kryetari i grupit parlamentar të PR, Madhi, tha se dispozita e miratuar nga komisioni bën të mundur që Presidenti i Republikës të nxjerrë dekretin për caktimin e datës së zgjedhjeve, pas hyrjes në fuqi të Kodit zgjedhor. "Me këtë amendament, përjashtohet çdo mundësi për keqkuptim, apo keqintepretim lidhur me datën e zgjedhjeve", - tha Madhi. "Presidenti është i detyruar që në konsultë me partitë parlamentare, të dekretojë si datë të zgjedhjeve të ardhshme parlamentare një nga dy datat e ligjshme të mundshme, 22 qershorin, ose 28 qershorin 2009", shtoi ai.