Rama në Tropojë pavarësisht motit të keq
E Djelë, 03.22.2009, 10:44am (GMT+1)
Voal-online Në kuadrin e fushatës zgjedhore, e cila ka filluar në Shqipëri prej disa muajsh, Kryetari i Partisë Socialiste Edi Rama, ndonëse në mot të keq, e vizitoi Tropojën për të dytën herë në pothuajse dymbëdhjetë muaj. Në vizitën e tij ai shoqërohej nga anëtarë e simpatizantë të PS-së. Policia e Shtetit dhe Shërbimi Informativ Shtetëror kishin marrë masa të rrepta sigurie gjatë vizitës. Rama është treguar i përmbajtur në fjalimet dhe në takimet që ka pasur me tropojanët. Ndër të tjera, ai nuk e ka zënë fare në gojë Sali Berishën. Kryetari socialist është përqëndruar më tej në tezën e tij për një politikë përtej së majtës dhe të djathtës dhe ka apeluar nevojën e bashkimit të tropojanëve përtej përkatësisë politike, socialist apo demokrat. Rama shkoi për herë të parë në Tropojë më 26 prill 2008. Për kreun e PS-së, "qytetit që ka votuar përherë djathtas i ka ardhur koha për t'u bashkuar" sepse sipas tij "këtu nuk është fjala për socialistë apo demokratë". Vizitat e Ramës në Tropojë, vendlindjen e Sali Berishës, shikohen nga socialistët si sfidë ndaj kryetarit të Partisë Demokratike, njëkohësisht kryeministër i vendit prej shtatorit 2005.
|