Në Teatrin Kombëtar të Operas, Baletit e Ansamblit Popullor, Shoqata "Tropoja", Unioni Artistik i Kombit Shqiptar, Qendra Ndërkombëtare e Kulturës "Pjetër Arbnori" e Forumi Shqiptar i Kulturës, Edukimit e Shkencës, përkujtoi me një veprimtari jubilare 60 vjetori i lindjes i poetit, dramaturgut e publiçistit Selim Aliaj, që 10 vjet më parë humbi jetën në mënyrë aksidentale. Në këtë veprimtari ishin të pranishëm  krijues e interpretues të penës e skenës, deputëtë e diplomatë, përfaqësues të shoqatave nga Tropoja, Labëria, Kosova, Devolli, Struga, Libohova, Ulqini, Golloborda, Përmeti, Kukësi, etj., miq e të afërm të poetit, etj. Fjalën kryesore për jetën e veprimtarinë e tij krijuese e mbajti shkrimtari i mirënjohur Besnik Mustafaj, njëherazi edhe botues i vëllimit poetik "Muzat e dhimbjes" (2001) të Selim Aliajt.

Në fjalët e tyre poeti Hamit Aliaj, drejtori i QNK "P.Arbnori", poeti e publiçisti Mujë Buçpapaj,  presidenti i Unionit Artistik të Kombit Shqiptar, z. Azgan Haklaj, poeti Anton Papleka, (ish-kryetar i degës së Lidhjes të Shkrimtarëve e Artistëve të Tropojës), kryetari i komunës së Tropojës, Shpend Hoxha, deputeti i Matit, Qemal Minxhozi, (ish-kryeredaktor i gazetës "Drita e Drinit" në Fierzë), aktori e dramaturgu Azem Baliaj, etj. sollën kujtimet e tyre për Selim Aliajn dhe vlerësime për krimtarinë e tij si poet, dramaturg e publicist si për vëllimet poetike "Njerëzit e dritës", (1977), "Muzat e dhimbjes" (2001), dramën "Burrat e Shtatë Bjeshkëve" ( 1979), një vëllim poetik për fëmijë, etj.

Forumi Shqiptar i Kulturës, Edukimit e Shkencës e nderoi (pas vdekjes) me Cmimin "Pjetër Bogdani", çmim të cilin ia dorëzoi familjes së poetit, Sekretari i parë i Ambasadës së Republikës së Kosovës në Tiranë, z. Gani Vejseli.

Në këtë veprimtari përkujtimore përshendetën edhe Shoqata "Devolli" e Korçës, Shoqata "Dangëllia" e Përmetit, etj. Këngtarja Fatmira Breçani, "Bilbili i Këngës Tropojane" këndoi këngë me tekste të autorit Selim Aliaj. Aktori i QNK, Mina Koçaku interpretoi disa poezi nga krijimtaria e poetit. Krijuesi e mbledhësi i palodhur i folklorit të Malësisë së Gjakovës, Nuredin Lushaj, recitoi një  vjershë kushtuar këtij poeti nga Kasajt e Tropojës.

 

                                                                  Valdet Ermali

 

Tiranë, më 06.05.2009