Një takim sa politik dhe miqësor, emocionues e plot ndjenjë, me zytarin e lartë
të Departamentit të Shtetit të SHBA, Jonathan Moore. Nuk do të shlyhet kurrë
nga kujtesa ime dhe e familjes sime.
Une kam patur shumë takime të nivelit të lartë si Ministër i Punëve të Jashtme,
si Koordinator i Krizës së Kosovës, si Ministër i Financave dhe si Kryetari i
Parlamentit, me Presidentë,Kryetar parlamentesh e senatesh, me Kryetarin e OKB,
NATO, BE, e tjerë e tjerë, me ministra të të gjithë portofoleve, deputetë, nobelistë
e shumë e shumë të tjerë, por ky ka qënë një takim i vecantë, miqësor, i
paharrueshëm sepse kur zyrtari i lartë amerikan interesohej vecanërisht për
familjen time. Jam takuar në takime zyrtare me Kolin Paull apo Kondoleza Rajs,
kam shternguar duart me Xhorxh Bush ne Samitin e Bukureshtit të Natos por
zytari i lartë Moore do të ishte pranë meje pikërisht në momentin kur unë po
lincohesha me metodat nga më të paimagjinueshmet të stilit sovjetik, të stilit
të revolucionit kulturor kinez, të stilit të kmerëve të kuq, të stilit
koreanoverior, të konceptuara, të organizuara dhe të zbatuara nën drejtimin e
personit që kërkon të bëhet kryeministër i Shqipërisë. Sinqerisht më vinte edhe
turp e njëkohësisht jam ndjerë edhe shumë keq që unë më duhet të shpjegohesha
për veprimet e paimagjinueshme të një individi me të cilin kisha
bashkëpunuar...por nuk bashkëndaja më mendime dhe opinione të njejta dhe për
shkak të kësaj ai duhet të perfundonte në veprime ekstreme personale dhe aq më
e rëndë ishin ato kundër familjes sime...
Fare thjesht: Faleminderit SHBA, nga unë dhe familja ime. Faleminderit shumë....
Ja cfarë ka thënë zoti Moore, që tani ne e konsiderojmë si "mikun" e familjes
sonë:
"Ne jemi shumë të shqetësuar nga ajo që kemi parë. Ka një nivel të lartë
tensioni politik para këtyre zgjedhjeve, sërish, me pikëpyetje e akuza mbi
çështjen e ligjshmërisë.Duhet të them se një nga personat me të cilët u takova
dje ishte z.Kastriot Islami. Parimet demokratike përfshijnë sigurisht jo vetëm
të drejtën e njerëzve për të votuar në zgjedhje por edhe të drejtën e anëtarëve
të parlamentit të votojnë sipas ndërgjegjes së tyre. Ne jemi shumë të zhgënjyer
dhe të shqetësuar që kishte presion të drejtpërdrejtë nga protestues para
shtëpisë së një anëtari të parlamentit. Presioni kundër tij e familjes së tij
është i gabuar."
Lexojeni me kujdes dhe vëmendje. Lexojeni se është një leksion demokracie.
Lexojeni se është një mesazh jo vetëm për mua dhe familjen time por për të
gjithë shqiptarët. Vecanërisht për drejtuesit e partive, për deputetet dhe të
gjithë ata që synojnë të merren me politikë. Sidomos të rinjtë që të mos
kthehen në marioneta për të kryer veprimeve kundër parimeve të demokracisë.
Lexojeni...
Ja çfarë ka thënë zotiMoore:
Së pari, ka kujtuar një parim të rëndësishëm demokratik: ....të drejtën e
anëtarit të parlamentit të votojë sipas ndërgjegjes së tij. Të votojë sipas
ndërgjegjes së tij dhe jo sipas urdhërit partiak. Të votojë sipas ndërgjegjes
së tij dhe jo sipas diktatit të partiak. Të votojë sipas ndërgjegjes së tij dhe
jo nën kërcënim politik. Të votojë sipas ndërgjegjes së tij dhe kështu
konsiderohet se ka respektuar parimet demokratike, krejtësisht ndryshe nga
cfarë deklamon personi që synon të bëhet kryeministër që i cilëson të gjithë
ata që nuk i binden diktatit të tij si "mercenarë, të shitur.." apo që personat
e organizuar prej tij i konisderojnë "tradhëtarë"... Të votojë sipas bindjes së
tij pavarësisht se si është zgjedhur dhe nga cila parti është zgjedhur. Ky
është parim themelor i demokracisë. E kundërta, mandati me urdhër është
koncepti jakobin dhe është aplikuar nga partitë fashiste, nga partitë
staliniste, dhe sot aplikohet vetëm nga partitë autoritare.
Së dyti, SHBA është shumë e "zhgënjyer nga presioni përmes protestës së
organizuar para shtëpisë....". Kjo do të thotë se SHBA është e zhgënjyer jo vetëm
për aktin por edhe autorët. Konceptuesi, organizatori dhe autori i vetëm është
sipas meje kandidati për kryeministër. SHBA është e shqetësuar dhe e zhgënjeyer
nga kjo ngjarje. Familja ime tanimë ndjehet e qetësuar nga mbështetja që vjen
nga SHBA. Ndjehet e sigurtë se është marrë në mbrojtje morale nga SHBA.
Edhe njëherë: Faleminderit edhe një herë SHBA dhe të miqëve që kanë arritur me
mijra të na telefonojnë e të na mbështesin, të shqetësuar dhe të gatshëm të
bashkohen me ne përballë kësaj ngjarje të rëndë sulmi kundër demokracisë dhe
parimeve demokratike. Ne tanimë jemi të qetë por nuk mund të mos evokoj dicka
shumë të rëndësishme.
Unë do të vazhdoj me vendosmëri të kontribuoj në vendim tim, ti shërbej vendit
tim, të vë në dispozicion të progresit të vendit të gjithë eksperiencën dhe
kapacitet e mia për vendin tim, duke ju bindur vetëm ndërgjegjes sime, vetëm me
integritet e ndershmëri, vetëm me qetësi e maturi, dhe pa asnjë inat apo
ndjenjë revanshi. Unë i konsideroj të gjithë ata që janë ndryshe nga unë vetëm
kundërshtarë në ide e opinione. Unë nuk e përdor kurrë termin "armik,
tradhëtarë, mercenarë"... për ata që mendojnë ndryshe nga unë. Unë nuk ndeshem me
asnjërin prej kundërshtarëve të mi duke përdorur forcën fizike, fyerjet apo
urrejtjen. Pika ime më e fortë është forca e arsyes, është truri dhe në këtë
ballafaqim midis njerzve që përdorin arsyen e trurin unë jam shumë i vendosur
në argumentat e mi dhe jam i gastshëm të bashkëpunoj me të gjithë ata më të
cilët bashkëndaj të njëjtin arsyetim për të konkuruar me të gjithë ata që
mendojnë ndryshe.
Së fundmi, por shumë e rëndësishme, që nuk mund të mos e them: Nëse në këtë
betejë pas 22 vjetësh përpjekjesh e ballafaqimesh të panumurta do të ndodhë
dicka sado e vogël ndaj meje apo familjes sime, nuk duhet të lodheni shumë për
të kërkuar autorin. Ai është qartësisht i vetëevidentuar dhe
vetëidentifikuar..."Akuza" ime është paraprake përderisa nuk do të distancohej
nga gjithcka ka organizuar dhe/ose nuk do të kërkonte ndjesë publike...
Duke e përmbyllur këtë mesazh publik falenderimi:
Faleminderit zoti Moore,
Faleminderit ambasadës së SHBA në Tiranë,
Faleminderit Ambasadorit Arvizu,
Faleminderit Jeniffer Moore. Faleminderit Ermal
Faleminderit SHBA...
Me shumë respekt, ndjenjë e emocion
Nga Kastriot Islami dhe familja ime...
Tiranë 19 prill 2013