M. Gecaj
1.
Që në vitet e rinisë, kur kisha nisur të punoja në shtyp, publicistin
Duro Mustafaj e kujtoj gjithnjë buzagas, por dhe tek ecte me hap të
shpejtë, sikur do të bënte "garë vrapimi"! Megjithëse është ca i moshuar, i
tillë m'u shfaq ai edhe sot, në afërsi të stacionit të trenit, në
kryeqytet. Pasi shkëmbyem përshëndetjet e rastit, futi dorën në çantën e tij
dhe prej andej nxori një revistë.
-Por ta jap dhuratë këtë revistë të re, të ilustruar. Është numri i parë
i saj dhe del në qarkullim nga krahina jonë e Labëris. Revista jonë do të jetë
periodike...
Sigurisht, e falënderova mikun tim të kahershëm dhe, shpejt e shpejt, i hodha
një sy kopertinave të saj. Ashtu më këmbë, lexova edhe shënimin, që është në
pjesën e prapme të kopertinës së parë: "Ky numër i revisës "Hora" është një
dhuratë e botuesit të saj, z.Besnik Hasani, për anëtarët e Shoqatës
Atdhetare-Kulturore "Vranishti". Ajo do të shpërndahet falas edhe për
ish-pajtimtarët e gazetës "Hora", për bashkëpunëtorët dhe miqtë e saj". Në
shënimin e bërë nga redaksia, me këtë rast, thuhet: "Po, nëpërmjet faqeve të
"Horës" edhe Vranishti do të bashkëbisedojë me Vlorën, Labërinë e më gjerë".
Megjithëse jam nga Malësia e Gjakovës (Tropoja), e "përfshiva" veten në këta
lexues, që përmenden më lart. Këtë gjë e them se, vetëm në familjen tonë Gecaj,
kemi 4 nuse nga Vlora, por edhe sepse kam shumë kolegë e miq të mirë, nga ajo
krahinë atdhetare, liridashëse e përparimtare. Pra, a kam të drejtë edhe unë të
shprehem:"Jam kusheri me vlonjatët, pra dhe me vranishtiotët?"(ha,ha)
2.
Kopertinat e revistës...
Tani dëshiroj ta shfletoj, bashkë me lexuesin, këtë numër të parë të revistës
së re, emri i të cilës na kujton edhe arbëreshet, me ngulimet e tyre në Italinë
e Jugut, që pas vdekjes së Skënderbeut. Ajo, që na bën të ndjehemi mirë, që në
fillim, është fotografia e një vogëlusheje dhe vjersha e botuar, bashkë me të:
"Ç'faj kam unë, që jam si shpirt,/ faqet mollë e sytë dritë,/ se kam lindur në
Vranisht,/ ku jetojnë Perënditë?/ Vranishtiote e mirë jam,/ emrin Hora unë e
kam...".
Duke i nisur shkrimet me figura të shquara të Kombit tonë, revista u kushton dy
artikuj, Faik Konicës dhe prof.Shaban Demiraj-Akademik. Nga Agron Metaj,
janë sjellë në kujtesën e lexuesve "dy kapedanët e Jugut", Çerçiz Topulli e
Sali Vranishti. Shkrime janë publikuar, nga Luan Çipi edhe me rastin e
80-vjetorit të lindjes së dy shkencëtarëve të njohur, akademikëve Teki Tartari
e Bardhyl Golemi. Ndërsa në një faqe është botuar shkrim për Shqiptaren e
Madhe, Nënë Tereza. Po është shkruar edhe për figura të tjera të njohura të
krahinës, si për prof. Bardhosh Gaçen e Selman Pazajn.
Vranishtiotët kanë edhe shpirt artisti, njihen për kangët e vallet e tyre të
traditës. Prandaj shkruhet në faqe të veçanta për "bilbilin në këngë,
shqiponjën në valle", Arap Çeloleskajn. Lidhur me këtë artist të rrallë, i cili
mbetet gjithnjë në kujtesën e brezave, Elizabeta Alikaj ka botuar vjershën e
saj, "Ka bilbila Labëria". Më tej, është botuar shkrimi "Si lindi një kengë",
nga Muhamet Tartari, "Mjeshtër i Madh". Me një shkrim të posaçëm nderohet
kujtimi i shkrimtarit të shquar Skënder Hasko, i cili shprehej: "Do të më
pëlqente ta ndieja veten edhe unë, vranishtiot...". Gjithnjë duke nënvizuar
vlerat e shquara të shkrimtarëve dhe artistëve vranishtiotë, është botuar
biseda e Albert Abazajt, me skulptorin Zeqir Alizoti, autor i Monumentit
kushtuar Ismail Qemalit, "Hero i Popullit".
Ku nuk kanë shkuar dhe emigruar shqiptarët, pra edhe ata nga rrethi i
Vlorës! Ramadan Ramadani na njeh me vajzën vranishtiote, Ola Petro
Limajn, e cila vahdon studimet në Universitetin e Seulit, të Koresë së Jugut.
Po, vranishtiotët kanë shkuar edhe deri në Pekin. Për këtë fakt na flet, me
shkrimin e tij, juristi Luan Hasanaj, se si është takuar dhe njohur me përkthyesin
e Çu En Lait, kinezin Fan Tce Cun. Një shkrim tjetër tregon për mbesën
vranishtiote, Teuta Limaj (Ribstein), e cila ka dhënë shfaqje të sukseshme në
Luksemburg, bashkë me dy ish-bashkënxënës të saj, në Liceun Artistik "Jordan
Misja". Gjithashtu, është folur për mbesën e Vranishtit, gazetaren në Nju
Jork, Beslinda Pazaj.
Mysafirë të revistës "Hora" janë anëtarët e Klubit të Shkrimtarëve "Petro
Marko" të Vlorës. Aty është shkruar për 100-vjeçarin P.Marko dhe për
jetën e krijuesit të njohur, Luan Hysni Toto. Nga poezia e Myrteza Marës, po
shkëpusim dy vargje të fundit të saj: "Dashuria na bën të pavdekshëm,/ kënga i bën
shpirtërat të rrojnë!" Ndërsa
vjersha "Vranishtit" (D.M.), mbyllet me
vargjet: "Ti, gjak e dashuri ke dhënë,
bujarisht,/ i ashpëri, fisniku, Vranisht...".
Interesin e lexuesve e
tërheqin edhe faqet e fundit të revistës, ku janë botuar kërshëri, shënime për libra të rinj, këshilla
shëndetësore etj.
Në mbyllje, e përshëndesim
redaksinë e kësaj reviste të re dhe "Horës" i urojmë jetëgjatësi, si dhe
shkrime sa më cilësore, për jetën, punën dhe veprimtarinë e njerëzve të mire,
si të Vranishtit e tërë Vlorës dhe më gjerë!
Tiranë, 20 prill 2013
Comments (0)
Dërgoja shokut
Printo
