VOAL - Online Zëri i Shqiptarëve - AZGAN HAKLAJ, AUTOR ME INDIVIDUALITET PANSHQIPTARNga EMIN AZEMI, publicist, pedagog në UEJL, Tetovë

Azgan Haklaj vjen me një titull të ri që përpos ngarkesës semantike, ka edhe kontinuitetin e një kredoje publicistike. "ASHTI I KOMBIT" identifikon prirjet e autorit për të bashkuar epikën me rrëfimin modern, si dhe për të sintetizuar hulumtimin etno-kulturor me atë social-politik. Recepienti shqiptar nuk mund të jetë indiferent kundruall mjeshtrisë së pejsazhit narrativ që autori shtrin gjatë udhëtimit në kohë e hapësirë. Detaji i pavëmendshëm që mund t'i ikë një vëzhguesit të rastit, tek Azgan Haklaj merr statusin e mikrongjarjes, sepse vetëm autorët si ai u japin jetë e gjallëri situatave.
I kompozuar si një tërësi me diversitet tematik e stilistik, ky libër sjell para lexuesit imazhin e gjallë të kontrastit në politikë, kulturë, etnopsikologji etj.
Azgan Haklaj edhe me këtë vepër po dëshmohet se është një polemist i kultivuar i letrave shqipe, por edhe një erudit që injekton në memorjen tonë jehonën e një kohe dinamike.
Njëkohësisht ai është edhe kronist pedant, atëherë kur ndërlidh algoritmin kohor me galerinë e gjerë të protagonistëve të fushave të ndryshme.
Pasioni për të shpërnda vëmendjen e lexuesit në një planimetri më të gjerë hapësinore, ku gjejnë vend emra të përveçëm të politikës e kulturës mbarëtnike, e bën Azgan Haklajn një autori me individualitet panshqiptar, një model ky i munguar në publicistikën shqiptare.
Autorët, bashkë me veprat e tyre, në varshmëri nga korpusi tematik e strukturor, identifikojnë përcaktueshmërinë e vlerave.
Azgan Haklaj me këtë libër edhe njëherë rikonfirmon frymën civilizuese perendimore në ligjërimin publik, duke u bërë kështu zë i atyre forcave që duan të afirmojnë botërisht vertikalen shpirtërore të shqiptarisë, me një gjuhë të qartë e të pasur.
Shëngjin, 11 mars 2014