VOAL - Online Zëri i Shqiptarëve

BASHKIM PA KUSHTËZIME DHE FISNIK I LDD-së ME LDK-në
Nga IDRIZ ZEQIRAJ

E Djelë, 05.03.2015, 07:07am (GMT1)

Çdo ndarje është e dhimbshme, e trishtme. Çdo ndarje është një humbje. Këtë e provoi LDK-ja në Kuvendin e 6-të, në Kuvendin e turpit të madh. Të dy palët janë pjesë e fajësisë. LDK-ja dhe LDD-ja, por, të parës i faturohet fajësia e madhe. Dhe, kjo për disa arsye: 1.- Mënyra e shkarkimit e akademik Nexhat Dacit, nga kreu i Kuvendit, ishte tendencioze dhe skajshëm provokative, jo vetëm për atë, por, për të gjithë anëtarësinë e LDK-së e më gjerë. "Nexhat Daci të vjen këtu dhe të japë dorëheqje nga kryetar i Kuvendit", - çirrej e kacagjelohej ciniku Eqrem Kryeziu, intrigues e klanor, përçarës deri në ndarje të LDK-së. 2.- Procedura parazgjedhore e mbledhjes të firmave ishte hileqare, sepse prof. Fatmir Sejdiu, duke qenë president, në shpërdorim të këtij posti, favorizohej. 3.- Përzgjedhja selektive e anëtarëve të Këshillit të Përgjithshëm të LDK-së, ishte shumë përjashtuese dhe skajmërisht provokuese. 4.- Pajtimi dhe afrimi i njerëzve që kishin përbuzur LDK-në dhe vet Presidentin Rugova, favorizimi i tyre me poste dhe injorimi i kuadrit të sprovuar të dhe të përkushtuar të LDK-së.

Duke zhgënjyer e dëshpëruar

Ishte një fitore e zotit Sejdiu, që përcaktonte humbjen e sigurtë të tij në Kuvendin pasues. Dhe, kjo për arsye se, edhepse, zoti Daci la kohë e hapësirë për korrigjime, sidomos në përbërjen e Këshillit të Përgjithshëm, zoti Sejdiu, për habinë e të gjithëve, sepse ishte shquar për maturi dhe fort i pranueshëm nga anëtarësia, injoroi keqas rivalin Daci, duke zhgënjyer e dëshpëruar fort anëtarësinë e LDK-së.

Ndarja e LDK-së dhe krijimi i subjektit të ri politik, LDD-së, u përjetua rëndë nga anëtarësia e të dy degëzimeve: LDK-së dhe LDD-së, por, jo edhe nga klani, tashmë, i aktivizuar brenda Kryesisë të LDK-së! Klani krejt i vetëdijshëm, po e çonte LDK-në drejt humbjes, në opozitë. Karrikja e deputetit, e siguruar për klanin, nga përcaktimi i turpshëm - Kosova me një zonë zgjedhore - ishte ngushëlluese dhe e mjaftueshme për ata. Demoralizimi në mesin e elektoratit rugovian, sa vinte e shtohej. Për rrjedhojë, anëtarësia, elektorati po pakësohej, madje reciprokisht, në dy subjektet. Dhe, kjo u bë e qartë për të dy palët. Edhepse krerët e LDD-së dhanë shenja pajtimi e bashkimi, klani brenda LDK-së e injoronin dhe refuzonin këtë afri, me slloganin marrëzishëm dhe idiotesk: "Dyert e LDK-së janë të hapura për të gjithë"!!!

Kuvendi i 7-të i LDK-së, në vend të analizës të veprimtarisë ndërmjet dy kuvendësh, bëri kompromisin e turpshëm dhe, përjashto votimin korrekt për kreun e partisë, zgjedhja e Këshillit të Përgjithshëm e më pas edhe e Kryesisë ishte pa votë demokratike, ishte emërim tipik monist. Pra, Kuvendi i 7-të i LDK-së ndërroi vetëm kreun e partisë, ndërsa klani mbeti i paprekur, përjashto ndonjë vdekje apo sëmundje e ndonjërit. Edhe qëndrimi ndaj LDD-së, mbeti i pandryshuar dhe slloganet ricikloheshin, përsëriteshin, në një kohëzgjatje prej më shumë se tetë vitesh.

Hilmi Gashi, nënkryetar i Degës të LDD-së në Gjermani

Qyteti Ulm, në Gjermani, njihet nga mërgata shqiptare qysh në vitet `90-a, sepse, pikërisht, në periferi të këtij qyteti, në Weisenhorn, ka qenë qendra administrative e 3 %-shit, madje edhe selia e Qeverisë të Përkohshme në ekzil, e kryesuar nga dr. Bujar Bukoshi. Në hotelin "Maritim", me pesë yje, i ngritur, si një rrokaqiell, buzë Danubit, në Ulm-in e Ri, prej nga soditej panorama impozante e mahnitëse e qytetit, më 15 prill 2015, u mbajt takimi i dardanëve të Diasporës. Një sallë enkas për tubime, e stolisur me flamuj kombëtarë e shtetërorë, si dhe partiakë e vendor - gjerman.

Organizatori pritës, Hilmi Gashi, kishte bërë të gjitha përgaditjet e nevojshme. Ai priste anëtarët e LDD-së nga Gjermania dhe Zvicra si dhe mysafirët nga LDK-ja. Të parët arritën sekretari i Degës të LDK-së për Gjermani, Shpend Shala dhe anëtari i Kryesisë të LDK-së në Zvicër, Shefqet Dibrani, veprimtarët Xhafer Leci, Muharrem Maliqi, Sali Berisha, Sami Gagica, Blerim Hajdaraj dhe të tjerë. Nga Zvicra erdhi sekretarja e Kolegjiumit të Degve të LDD-së në Mërgatë, Zize Pepshi, e shoqëruar nga anëtarët e Kryesisë: Remzi Durmishi, Hazbi Gubetini, Ilaz Kadriu, Gani Orushta.

Hilmi Gashi: Kthimi në shtëpinë e vjetër

Zotëri Hilmi Gashi, nënkryetar i Degës dhe anëtar i Këshillit të Përgjithshëm të LDD-së, nga Polluzha e Drenicës, ka qenë oficer i karrierës. Fati i tij, ashtu si edhe i shume kolegëve të tij, lënë shërbimin ushtarak në ish-armatën jugosllave. Për rrjedhojë, edhe ushtaraku Hilmi Gashi, fillon jetën e ilegalitetit. Krismat e para të pushkëve e gjetën me armë në dorë, përkrah komandantit të tij, kolonel Tahir Zemaj. Beteja e Loxhës ishte vetëm fillimi, për të vazhduar aksionet dhe betejat tjera.

Duke qenë në krye të këtij organizimi, së bashku me znj. Zize Pepshi, zotëri Hilmi Gashi, mbajti një fjalë rasti:

Zonja dhe zotërinj, të nderuar përfaqësues të Degëve të LDD-së, për Mergatë, më lejoni që në emer të Kryesisë së Lidhjes Demokratike të Dardanisë, Dega Gjermani, si dhe në emrin tim personal, t`ju uroj mirëseardhje në takimin e sotëm, i cili është ftuar nga Kolegjiumi i Degëve të LDD-së, për Mërgatë, nikoqir i së ciles është Dega e LDD-së, në Gjermani. Në këtë takim na nderon me pjesëmarrjen e Tij akademiku me renome ndërkombëtare, lideri jonë i respektuar, zotëri Nexhat Daci. Andaj, në emrin tuaj e përshëndesim dhe e falenderojmë përzemërësisht.

Urimet e mia të sinqerta për Sekretaren e Kolegjiumit të Degëve për Mërgatë, znj.Zize Pepshi; Kryesinë e Degës së LDD-së, për Zvicër; Sekretarin e Degës së LDK-së, për Gjermani, z. Shpend Shala; anëtarin e Kryesisë së Degës së LDK-së, për Zvicër; poetin dhe publicistin e mirënjohur z. Shefqet Dibrani; gazetarin dhe të persekutuarin e ndërgjegjes, z. Idriz Zeqiraj; aktivistin e palodhur, dje dhe sot, z. Xhafer Leci; bahkëpunëtorin e RTK-së dhe TV Rrokum Roll, z. Halil Rrustemaj; ish-Sekretarin e aktivit të LDK-së, në Viersen, Reshat Murati, i cili, edhepse i sëmurë, gjeti forcë dhe kurajo të jetë sot në mesin tonë.

Dega e LDD-së në Gjermani, organizon këtë takim, pas një koordinimi me Kryesinë e Kolegjiumit të Degëve në Mërgatë, respektivisht, me Sekretaren e këtij Kolegjiumi, znj. Zize Pepshi si dhe Kryesinë e Degës të LDK-së në Gjermani, në fillim me z. Muharrem Sfarqa dhe Behxhet Ktasniqi, për të vazhduar me kryetarin aktual, Qazim Bajgoraliun.

Per takimin e sotëm, një falenderim të veçantë meriton z. Muharrem Maliqi si dhe këshilltari në kuvendin e Gjilanit z. Ziadin Maliqi, i cili, gjatë gjithë kohës ishte në koordinim në mes meje dhe Nënkryetarit të LDK-së z. Lutfi Haziri.

Zonja dhe zotërinj, i nderuari akademik Daci, platforma e përgaditur nga Kryesia e Kolegjiumit të Degëve për Mërgatë, që do ta shpalosë në vazhdim Sekretarja znj. Zize Pepshi, ka për qëllim kthimin tonë në shtëpinë e vjetër, për ndërtimin e së cilës, edhe ne kemi kontribuar, e sidomos akademiku i nderuar z. Nexhat Daci, i cili ishte njëri ndër bashkëpunëtorët e ngushtë dhe më besnik i Presidentit Dr. Ibrahim Rugova.

Të nderuar të pranishëm, nuk është e lehtë, që pas nëntë viteve veprimtarie politike, por edhe aktiviteteve me interes kombëtar, të LDD-së në Gjermani, të ndahësh nga ky subjekt politik. Veprimtaritë e organizuara janë të shumta. Të gjithë anëtarët e pranishëm dhe të tjerët në Evropë e gjetiu, gjithësecili ka bërë punë politike dhe atdhetarie, sepse njerëzit që u bënë pjesë e këtij subjekti, janë shtresë e ngritur akademike e intelektuale, profilesh të ndryshme, kuadro të dëshmuara në fusha të ndryshme të dijës, të shkencës, të arsimit, të kulturës, artit e tjera. Kudrot e këtij subjekti politik janë pritur në kancelaritë europiane e botërore, në mbrojtjen e së drejtës tonë kombëtare.

Zotëri Hilmi Gashi, në fjalën e tij tha se të gjithë jemi dëshmitarë të asaj gjendje të mjerueshme ekonomike-sociale dhe te sigurisë, që populli në Kosovë po përjeton, që nga shkuarja në amshim e Presidentit Dr. Ibrahim Rugova. Situata kaotike në Kosovë, filloi të krijohet në vazhdimësi, nga qeveritë e pandërgjegjshme, të dala nga zgjedhjet në Kosovë, gjithmonë pas dobësimit dhe përqarjes së LDK-së, që filloi në Kuvendin e VI-të zgjedhor. Kur i gjithë elektorati rugovian shpresonte se nga ky kuvend LDK-ja, do del më e fortë dhe më stabile, si dhe e përgaditur per të marrë timonin dhe për të drejtuar Kosovën në rrugën e trasuar nga Presidenti Dr. Ibrahim Rugova. Kuvendi i VI-të zgjedhor i LDK-së, ishte humbje për të gjithë LDK-në, elektoratin e saj. Nga ky kuvend fitimtar doli kundërshtari politik i LDK-së, i cili, në fakt, kishte investuar një kohë të gjatë, për të drejtuar LDK-në kah opozita, ndërsa qytetarët drejt kaosit dhe pasigurisë.

Kaosi dhe pasiguaria në Kosovë, si dhe eksodi i fundit, na dha forcë dhe kurajo, që të harrojmë fërkimet e thashethemet e mëparëshme dhe të shtrijmë dorën e bashkimit, ta forcojmë dhe ta përgadisim LDK-në, për fitoren e rradhës.

Pamje nga takimi

NUK KEMI DEMOKRACI TË MIRËFILLTË NË KOSOVË,

MADJE AS BRENDA PARTIAKE

           Fjala e Zize Pepshit, sekretare e Kolegjiumit të Degëve të LDD-së në Mërgatë

 
     Ndërsa Zize Pepshi, në emër të kolegjiumit të degëve në Mërgatë, 
tha se takime të tilla shërbejnë për të shprehur përkushtimin tonë për 
Kosovën, përkushtim ky, i cili, në vazhdimësi ka qenë i lidhur me 
vizionin për Pavarësinë e Kosovës. Vizion i cili na ka mbajtur fuqishëm 
të lidhur me procesin e madh dhe me krijuesin e Tij, njeriun e 
pavdekshëm, i cili i dha emër, nder dhe Pavarësinë Kosovës, Presidenti 
Historik Dr. Ibrahim Rugova".


 
     Kane kaluar tej tri dekada kur ai doli në skenën politike të 
Kosovës, fillimisht si krijues e studius, e më pas udhëheqës e vizionar i
 Pavarësisë së Kosovës. Pavarësia është një proces që zhvillohet në 
etapa, kurse Pavarësi e vërtetë është vetëm ajo kur populli i Kosovës 
mund të vendosë vet, për aq sa mund të vendosin për vetën e tyre edhe 
popujt e vendeve të zhvilluara në Evropë dhe kudo në botë.

 
     Ky vizion lidhet, në tërësi, me personalitetin e Presidentit 
Rugova, i cili, si askush tjetër, qe largpamës dhe diti ta projektojë 
Pavarësinë e Kosovës, prej një stadi fillestar të një artikulimi politik
 i kërkesës, deri te intervenimi i NATO-s, protektorati ndërkombëtar i 
OKB-së, akti formal i shpalljes së Pavarësisë , integrimi në NATO, dhe 
ne Bashkimin Evropian , dhe kjo gjithmonë në një miqësi të përhershme me
 Evropën dhe SHBA-të.

 
     Presidenti Rugova, ishte i thjeshtë, i kuptueshëm dhe i qartë për 
të gjithë, sepse njerëzit e mëdhenj janë të thjeshtë, të qartë dhe të 
kuptueshëm", / tha Pepshi.

      Ajo tha se Lidhja Demokratike e Dardanisë, si brenda, ashtu edhe jashtë vendit, u krijua nga njerëzit më të përkushtuar,
 për ta ruajtur dhe vazhduar vizionin e Presidentit Rugova, sepse ky ka 
qenë dhe do mbetët vizioni i vetëm . Ne, në Mërgatë, jemi aq shumë të 
lidhur dhe të përkushtuar për këtë vizion dhe për vet çështjen e 
Kosovës, sa që nuk kemi pushuar e nuk do të pushojmë, që të organizohemi
 dhe të punojmë pandërprerë për atë.

 
     Degët e LDD-së në Mergatë, janë degë të fuqishme politikisht, që 
zhvillojnë vlerat e demokracise perëndimore, të udhëhequr nga Lideri me 
renome kombëtare e ndërkombtare, kryeparlamentari i parë i Republikës së
 Kosovës, Akademik Nexhat Daci, i cili, me fanatizëm po zhvillon 
konceptin e demokracisë, sepse, s`ka si vepron ndryshe, kur dihet se 
Akademik Daci, ishte jo vetëm bashkëpunëtori, por edhe miku më i ngushtë
 i Presidentit Rugova. Kur e them këtë, jam e sigurtë, duke e ditur se 
ky u bë kurban i proceseve. Dhe, kjo u pa në organizimin madhështor që i
 bëri varrimit të Presidentit Historik, gjë që e patën dëshmuar 100 
vende të botës, të cilat i kishin dërguar delegacionet e tyre në ditën 
mortore.

 
     Mërgata shqiptare e ka vlerësuar lart gjithë veprimtarinë 
intelektuale dhe politike të akademik Nexhat Dacit, prandaj edhe sot 
ndjehet krenarë që është në mesin tonë dhe
 për këtë ngjarje, që do i kushtohet fuqishëm besnikërisë së Presidentit
 Rugova, i cili, edhepse nuk është në mesin tonë fizikisht, na bashkon e
 na udhëzon në sfidat e jetës. Ne jemi shumë të brengosur që ka stagnuar, në tërësi, procesi i njohjes së shtetit të Kosovës. Tashmë e kemi parë se këtë barrë nuk janë të aftë ta bartin as kryeministri e as Presidentja e Kosovës.

 
     Burokracia e madhe e Kosovës nuk është e preokupuar me problemet 
tona, ajo është e preokupuar me tenderet dhe transferet ilegale të 
parave, të cilat investohen në prona të blera me paratë e paligjeshme 
apo financohet nga krimi i organizuar, i cili rekekton, jo vetëm firmat,
 por mbarë popullin e Kosovës. Duke e pare këtë mjerim, që nuk ka 
mbarim, e po i sjellë veç kob e vajë këtij populli të shumëvuajtur, 
degët e LDD-së në Mërgatë, në bashkëbisedim me liderin e saj, akademik 
Nexhat Dacin dhe me subjektin qendror të LDD-së në Kosovë, vendosëm, 
unanimisht, që për hirë të elektoratit të lodhur shpirtërisht, me 
gjendjen e kaosin e krijuar në vend, t`i bashkojmë forcat tona të 
përbashkëta, në bashkimin e të njëjtit vizion të Presidentit Historik të
 Kosovës LDK-së dhe LDD/së , në partinë gjigante të LDK- së të Ibrahim 
Rugovës, thuhet në fund të këtij Projekti të nënshkruar nga: Sekretarja e
 Përgjithshme, të Kolegjiumit të Degëve të LDD-së në Mërgatë, znj. Zize 
Pepshi.

     Në vijim, fjalën e mori kuadri i LDK-së, krijuesi dhe publicisti Shefqet Dibrani: "Jam
 i nderuar që gjendemi në këtë takim. Përshëndes akademik Nexhat Dacin 
dhe e përgëzoj për nismën e marrë, për t`u bashkuar me LDK-në. Vendimi 
Juaj duhet vlerësuar si ndihmë direkte dhe përforcim për LDK-në, e cila 
ka ngelur me një elektorat fort të lodhur. Nuk kemi demokraci të 
mirëfilltë në Kosovë, madje as demokraci brenda partiake. Ju keni 
ndërmarrë një nismë të drejtë dhe shumë të nevojshme. Ju lumtë!

     Sekretari i LDK-së për Gjermani, Shpend Shala,
 përshëndeti akademik Dacin dhe të gjithë të pranishmit, në emër të 
Degës të LDK-së në Gjermani. Jemi të nderuar që ju kemi në mesin tonë. 
Ju do t`ia ktheni dinjitetin LDK-së.

      Veprimtari i mirënjohur i Mërgatës shqiptare, Xhafer Leci,
 tha se pavarësisht zhgënjimeve, në vijimësi, edhe pas shuarjes fizike 
të Presidentit Rugova, ne kemi mbetur simpatizantë të LDK-së, si parti 
që ka epërsinë parimore dhe morale absolute në Kosovë. Tubimi i sotëm ka
 vlerë të veçantë, sepse opinioni do të informohet për bashkimin e dy 
subjekteve të ndara, krejt aksidentalisht, ngaqë kanë një burim dhe një 
frymëzim, vizionin e ideatorit dhe realizuesit të Pavarësisë të Kosovës,
 Presidentit Historik Dr. Ibrahim Rugova.

 
    Akademik Nexhat Daci është shquar në drejtimin e Parlamentit të 
Kosovës, në një kohë kur "komandantët", gjeneralë të vetëshpallur, 
mendonin se mund të bëjnë gjithëçka, të flasin kur të duan dhe sa të 
duan! Është pikërisht akademik Daci që ia ndali zërin mikrofonit, duke i
 dhënë leksionin e nevojshëm njeriut të gjithëfuqishëm Hashim Thaçit, se
 "je i barabartë me deputetët tjerë në këtë sallë dhe nëse nuk e ke 
ditë, mesoje tani, sepse foltorja ka radhë dhe kohë të caktuar, për 
debat kuvendor". Organizimi i përkryer e madhështorë i ceremonisë 
mortore të Presidentit Rugova, ishte meritë ekskluzive e akademik Dacit,
 përkundër kundërshtarëve të tij, që donin ta heshtnin, ta varrosnin pa 
"zhurmë", duke penguar edhe Gardën Kombëtare për pjesëmarrje, sikur ajo 
të ishte pronë private e shefave injorantë të pacipshëm dhe me prirje të
 theksuara rrugaçërore e kriminale.

     Gjyqet farsë kundër akademik Nexhat Dacit,
 ishin një hakmarrje primitive e dy palëve: e ekstremit bandë të majtë, 
por edhe të klaneve brenda LDK-së. Atë e akuzonin dhe dënonin për një 
palë syze leximi, ndërkohë që vetë kanë vjedhur milionat nga pasuritë 
shtetërore, shoqërore si dhe kanë vjelur dhe vjelin, edhe sot e gjithë 
ditën, haraçin privat.

            MIJËRA SHQIPTARË KANË HEQUR DORË NGA KOSOVA,
                        KJO ËSHTË HUMBJA MË E MADHE

     Akademik Nexhat Daci,
 përshëndeti tubimin, gjegjësisht, të pranishmit, duke i falenderuar 
organizatorët: Hilmi Gashin dhe Zize Pepshin, për punën e tyre të 
shkëlqyer si dhe bashkëpunimin me strukturat e LDD-së në Qendër dhe 
anëtarësinë në bazë. "Jam i ftuar nga Akademnia e Shkencave të Evropës, 
në kuadrin e një Konference të Shteteve Danubiane. Me këtë rast 
falenderoj edhe kryetarin e Akademisë për zgjedhjen e bërë për mua. Ju 
falenderoj për përkrahjen e dhënë dhe sjelljen shumë miqësore ndaj meje.

 
    Kam agjituar tek të tjerët, kemi vendosur pa asnjë kushtëzim të 
kthehemi në LDK-e, në shtëpinë tonë të vjetër, madje në kohën më të 
vështirë për LDK-në dhe Kosovën. Dhjetra - mijëra shqiptarë kanë hequr 
dorë nga pashaportat e Kosovës dhe kjo është humbja më e madhe, pas 
ikjes në Turqi, mbi bazën e marrëveshjeve kundra shqiptare, të bëra 
ndërmjet Turqisë dhe Jugosllavisë. Nuk ka ngjarë në historinë e Kosovës,
 edhepse të punësuar burrë dhe grua, ta marrin arratinë. Është një 
zhgënjim i madh, është humbje shprese. Resurset në Kosovë janë të 
mjaftueshme për një Kosovë me popullësi tri herë më të madhe. Por, kanë 
rrënuar gjithëçka.

 
    Lufta kundër meje ka qenë shumë speciale, me shpifje të rënda, sikur
 unë jam kundër ndërkombëtarëve, kundër Perëndimit. Jeta ime, shkolla 
ime, ka qenë jashtë Tërnovcit, jashtë Kosovës. Parimet dhe idealet e 
mia, formimi im si shkëncëtar, si intelektual dhe si njeri, është 
tërësisht perëndimorë.

 
    Më tej akademik Daci foli për hajninë galopante të pushtetarëve 
tanë. Ai solli shembuj nga bisedat e bëra, për këto probleme me 
ndërkombëtarët, që kanë punuar në Kamboxhia dhe Bosnjë. Dhe, rezulton se
 shumë më të përgjegjshëm kanë qenë pushtetarët në ato vende se sa në 
Kosovën tonë. Dhe, kjo është e dhimbshme, tragjike.

     Akademik Daci u përgjigj në pyetjet e bashkatdhetarëve tanë, për probleme të ndryshme në Atdheun tonë.

 
    Telegrame përshëndetëse, për aktin e bashkimit të LDD-së me LDK-në, 
kanë dërguar edhe anëtarët e Kryesisë të LDK-së: Lutfi Haziri dhe 
Muharrem Sfarqa.

 
    Në pamundësi për të marrë pjesë në tubimin e organizuar në Ulm të 
Gjermanisë, për ta bërë publik vendimin e kthimit në shtëpinë e vjetër 
LDK-e, telegrame përshëndetjeje dhe miratimin e bashkimit e kanë 
shprehur edhe: Mehdi Prushi, kryertar i derisotëm i Degës të LDD-së në 
Austri; Skënder Berisha, kryetar i Degës të LDD-së në Francë; Lulzim 
Zagragjaj, kryetar i Degës së LDD-së në shtetet e Beneluksit

 
     Gazetari dhe mjeshtri i kamerës, Halil Rrustemaj, e përcolli dhe 
fiksoi të gjithë - takimin e bashkimit - të dy subjekteve politike: 
LDD-së dhe të LDK-së. Ai, me kamerën e tij të artë, regjistroi akademik 
Nexhat Dacin, të nesërmen, në pjesëmarrjen e Tij në Konferencën 
Shkencore të Shteteve Danubiane.

IDRIZ ZEQIRAJ