VOAL - Online Zëri i Shqiptarëve

SOÇI 2014 - REKORD OLIMPIK, EMOCIONE DHE MEDALJE E Djelë, 02.09.2014, 10:58am (GMT1) Një skiator veteran tërhoqi dje vëmendjen me fitoren në konkurrimet në ekip në Lojërat Olimpike në Soçi. Norvegjezi Einar Bjoerndalen u bë konkurrenti më i madh në moshë që merr medaljen e artë olimpike në një sport. 40-vjeçari shënoi rezultatin më të mirë në dygarësh, duke thyer rekordin e vendosur nga kanadezi Duff Gibson, i cili ishte 39 vjeç kur mori medaljen e artë në Lojërat e Torinos në 2006. Bjoerndalen po ashtu arriti rekordin e vendosur nga norvegjezi tjetër Bjoern Daehlie për numrin më të madh të medaljeve të marra në Lojërat Olimpike Dimërore. Të dy ata kanë marrë nga 12 medalje. Konkurrenti i garave me patina, holandezi Sven Kramer tërhoqi dje vëmendje, pasi mbrojti titullin kampion në garën 5000 metërshe, duke marrë medaljen e artë dhe duke vendosur rekordin olimpik prej 6 minutash e 10.76 sekondash.   Norvegjia fitoi dy nga pesë medaljet e arta për të cilat konkurrohej dje. Përveç Bjoerndalen, Marit Bjoergen fitoi garën 15 kilometërshe të maratonës së skive për femra. Kanadezja Justine Dufour-Lapointe mori medaljen e artë në skijim të lirë. Shtetet e Bashkuara siguruan medaljen e parë të artë për këto Lojëra Olimpike. Sage Kotsenburg realizoi me mjeshtri programin e tij në garat e snowbordit për meshkuj.   20-vjeçari Kotsenburg tha se suksesi që kishte arritur i ishte dukur si ëndërr: "Fakti që mora medalje të artë në ditën e parë, kur konkurrimet me snowboard në pistë të hapur prezantohen për herë të parë në Lojërat Olimpike, është e pabesueshme. Nuk e mendova se do ta arrija pasi ishte ëndërr tepër e madhe. Jam tepër i gëzuar që e arrita. Jam kaq i lumtur që jam këtu, për të përfaqësuar Shtetet e Bashkuara dhe për faktin që jam në ekipin e parë olimpik që konkurron në garën e snowboardit në pistë të hapur. Fakti që mora medaljen e artë e bën këtë eksperiencë edhe më të ëmbël". Në patinazhin artistik dje, 15-vjeçarja ruse Yulia Lipnitskaya siguroi adhurimin e shikuesve me një program elegant të ekzekutuar me shumë mjeshtëri në konkurrimin e ekipeve të patinazhit artistik. Ajo siguroi 72.90 pikë, rezultati më i lartë në konkurrimin individual të patinatoreve. Në ndeshjen e hokejt në akull për femra, Kanadaja po përpiqet për të katërtën herë të sigurojë medaljen e artë olimpike. Dje ekipi kanadez mundi 5-0 Zvicrën. Amerika, një tjetër favorite e këtij sporti, mundi Finlandën me rezultatin 3-1. www.voal-online.ch

Copyright © 2005-2008 Nulled by [x-MoBiLe]. All rights reserved.