VOAL - Online Zëri i Shqiptarëve

QYTETARËT ME PREJARDHJE NGA KOSOVA KANË RRITJEN MË TË MADHE NË ZVICËR

E Enjte, 02.20.2014, 04:25pm (GMT1)



Bernë, 20 shkurt - Numri i të huajve gjatë vitit 2013 ka shënuar një rritje "neto" prej 61570 personash , që në krahasim me shtimin e shënuar në vitin 2012 (53000) paraqet një shpejtim të këtij procesi.

Po ashtu popullata e vendosur prej kohësh në Zvicër, me prejardhje të huaj është shtuar për 3.4 për qind, ndërsa në vitet pararendëse ky shtim ka qenë rreth 3 për qind në vit. Shifra e plotë e të huajve të cilët jetonin në Zvicër në fund të vitit 2013 ishte 1 milion e 88630. Dy të tretat e tyre vijnë nga shtetet e BE dhe EFTA.

Është interesante se shtimi i numrit të të huajve nga vendet e përmendura me 4.5% është dukshëm më i madh se sa ai i vendeve të treta, me 1.2%, ka shpallur sot Enti Federal për Migracion (BFM).

Sikur edhe në vitet pararendëse numrin më të madh të të huajve, me 301254 persona e përbëjnë italianët. Gjermanët me 293156 janë në vendin e dytë, portugezët në të tretin me 253769, francezët me 110.190, janë të katërt në listë dhe kosovarët të pestët, me 95140.

Me 15703 persona më shumë se një vit më parë, rritjen më të madhe e ka shënuar komuniteti kosovar. Ai është rritur më shumë se komunitetet tjera më të mëdha si ai portugez dhe ai gjerman.

Siç e thekson edhe vetë BFM, kjo rritje e numrit të kosovarëve nuk është shtim efektiv brenda komunitetit por rezultat i rritjes së numrit të atyre që kanë hequr dorë nga shtetësia serbe duke marrë shtetësinë kosovare. Pikërisht në këtë përpjesëtim paraqitet edhe zvogëlimi i numrit të shtetasve serbë në Zvicër gjatë vitit 2013. (kd)

www.voal-online.ch


Copyright © 2005-2008 Nulled by [x-MoBiLe]. All rights reserved.