Zviceranët e kundërshtuan me një shumicë të madhe votash futjen e një
page minimale në vend. Në një referendum, rreth 76 përqind votuan me jo.
Zviceranët mendojnë më tej se mund të bëhet edhe pa avionë të rinj luftarakë.
Publicitet kunder pages minimale
Vetëm 23 përqind e qytetarëve me të drejtë vote votuan për inisiativën
"Për mbrojtjen e pagave të ndershme", të ndërmarrë nga sindikatat dhe
partitë e majta. Përballë nivelit të lartë të çmimeve në Zvicër ata donin të
përcaktonin një taban prej 22 frangash - rreth 18 euro për orë pune. Kjo do të
ishte paga minimale më e lartë në botë dhe dyfishi i pagës minimale në
Gjermani, ku që prej vitit 2015 do të paguhen të paktën 8,50 euro për orë.
Rreth 330.000 vetë ose dhjetë përqind e personave që kanë të drejtë të
punojnë marrin në Zvicër një pagë për orë nën 22 franga. Megjithëse sondazhet
para referendumit tregonin se kjo inisiativë do të kundërshtohej në mënyrë të
qartë, përfaqësues të ekonomisë u mobilizuan fort kundër inisiativës së
sindikatave. Sipërmarrjet ekonomike u shprehën në parim kundër një ndërhyrjeje
tjetër në Legjislacionin e Zvicrës i cili e mbështet ekonominë, dhe i cili
thuajse nuk e njeh pushimin nga puna.
Shuplakë për qeverinë
Edhe për temën e dytë të referendumit, për politikën e mbrojtjes, e
shprehën zviceranët kundërshtimin e tyre. 53,4 përqind e pjesëmarrësve në votim
votuan me "jo" për planin e kabinetit qeveritar, për të blerë 22
avionë luftarakë suedezë, për rreth 2,6 miliardë euro.
Kufizime për pedofilët
Mbështetje të madhe nga ana tjetër mori siç pritej inisiativa për t'u
ndaluar për gjithë jetën pedofilëve që kryejnë akte penale çdo lloj veprimtarie
profesionale ose honorifike me fëmijë të mitur. Për këtë në referendum votuan
63 përqind e zgjedhësve. U mbështet gjerësisht gjithashtu edhe propozimi për të
sanksionuar në kushtetutë një kërkesë për të garantuar për shtetasit mjekimin
bazë së bashku me shërbimet shumë të kualifikuara të mjekut të shtëpisë.dw