20 dhjetor (Voal-online) – Sot prej orës 16:00 anembanë Zvicrës do të ndizen me mijëra qirinj, të cilët do t’i ndriçojnë urat, ndërtesat dhe sheshet, midis të cilëve edhe Sheshin Federal të Bernës. Aksioni „Një milion yje“, organizuar nga Karitas për të katërtin vit radhazi, synon të jetë një sinjal në favor të një shoqërie solidare, ku forca matet me mirëqenien e më të dobtëve,“ thuhet në deklaratën e organizatorit. Kjo veprimtari mbështetet, ndër të tjera, edhe nga këshilltarja federale Doris Leuthard. Vitin e shkuar anembanë Zvicrës u ndezën 90 000 qirinj. Pjesëmarrësit në këtë veprimtari ishin 200 000 veta.

Presidenti Bush e vendos Kosovën në Programin Amerikan të përfitimeve tregtare

20 dhjetor- Një zëdhënës i Këshillit të Sigurisë Kombëtare të Shteteve të Bashkuara të Amerikës bëri të ditur se Presidenti Xhorxh W. Bush nxori dje një shpallje duke shtuar Kosovën në programin e Sistemit të Përgjithësuar të Preferencave, që mundëson hyrjen pa doganë të 4650 podhime nga 131 vende dhe territore të caktuara. “Në dritë të faktit që Kosova është e pavarur nga Serbia, unë kam vendosur që Kosova do të jetë e caktuar si një vend i veçantë në zhvillim përfitues i Sistemit të Përgjithësuar të Preferencave,” citohet të ketë shkruar Bush në një letër drejtuar liderëve të Kongresit Amerikan./Voal-online.

19 Dhjetor 2008 - Parlamenti i Mbretërisë së Bashkuar mbylli procesin e Ratifikimit të Protokollit të Shqipërisë me NATO-n. Pas kalimit në komisionet parlamentare, u  bë edhe depozitimi i instrumentit, sipas ligjeve në fuqi. Edhe Parlamenti Gjerman ratifikoi Protokollin e Anëtarësimit në NATO për Shqipërinë. Në këtë mënyrë edhe Gjermania përmbyll procedurën parlamentare të ratifikimit. Futja e Shqipërisë në NATO është një hap konkret që kontribuon në stabilitetin dhe sigurinë e Europës.(Voal-online)

18 Dhjetor - Gjykata Ndërkombëtare Krimit për Ruandën e ka dënuar me burg të përjetshëm, Theoneste Bagasora, ish zyrtarin e lartë të ministrisë së mbrojtjes të Raundes për përfshirje në gjenocidin e vitit 1994. Bagasora akuzohej të kishte drejtuar gjenocidin në Ruandë dhe thuhet të kishte bashkëpunuar me të akuzuarit e tjerë në planin për të zhdukur pjesëtarët e minoritetit Tutsi si dhe të Hutuve të moderuar. Më heret Gjykata e Ruandës, e cila ndodhet në Tanzani, dënoi kunatin e ish presidentit të këtij vendi me 20 vjet burg për pjesëmarrjen e tij në gjenocid. Protais Zigiranjirazo akuzohej se i takonte skuadroneve të vdekjes që vranë qindra mijëra vetë gjatë konfliktit në këtë vend.

Rreth 800 mijë Tutsi dhe Hutu të moderuar u vranë brenda një periudhe 100 ditëshe gjatë vitit 1994.(Voal-online)

18 Dhjetor/ Voan-online – Zvicra vazhdon që të pushtohet nga bora. Pamjet e borës e bëjnë Zvicrën që t’i ngjajë një kartoline, por pa e përjashtuar nga bllokimi i rrugëve, aksidenteve. Deri dje ishin rregjistruar 200 aksidente dhe 17 të lënduar. Të rrëshqasësh në borë sot është diçka shumë e natyrshme, por duhet të jesh me fat të mos thyesh ndonjë këmbë apo krah. Banorët e Zvcrës e kanë në kulturën e tyre qytetare hapjen e rrugëve, duke i pastruar ato nga bora, por dëbora që bie pa rreshtuar duke mos bërë asnjë armëpushim e vështirëson detyrën e tyre. Vështirësia kryesore është se temperatura e lartë e kthen borën në akull, duke vështirësuar qarkullimin nëpër autostrada, por edhe atë hekurudhor si dhe të mjeteve të qarkullimit publik, siç janë tramat dhe autobuzët të cilët prej ngricës bllokohen në vend, siç ka ndodhur në Zürich, duke shkaktuar vonesa të gjata për qytetarët. Për disa orë është bllokuar edhe Aeroporti i Zürichut Kloten, duke bërë që të anullohen më tepër se 20 fluturime, ndërsa aeroporti i Bernës është bllokuar për dhjetë orë rresht. Bora ka mësyrë në të gjithë Zvicrën, vetëm në Gjenevë nuk ka rënë. Edhe sot pritet që të vazhdojë. Deri në ditët e weekendit ku pritet që të fillojnë rreshjet e shiut. Vetëm të hënën metereologë paralajmërojnë pak diell dhe mot të thatë.

17 Dhjetor /Revista “Time” ka zgjedhur fare pa mëdyshje njeriun e vitit Presidentin e zgjedhur të Shteteve të Bashkuara të Amerikës Barak Obamën (Barack Obama) “Njeriun e vitit”. Prestigjiozja amerikane ia ka kushtuar Obamës edhe ballinën e parë të numrit përkatës. Pamja e vendosur në ballinë, krijuar nga ish artisti i rrugës Shephard Fairey, qe shndërruar në një simbol të fushatës së tij zgjedhore. Kjo revistë ka një traditë të gjatë që, në javën e tretë të dhjetorit, të emërojë personalitetin më të shquar të vitit përkatës. Barak Obama është afroamerikani i parë që zgjidhet President i Shteteve të Bashkuara të Amerikës. Ndoshta për herë të parë në histori, një kandidat presidencial ka gjetur një përkrahje pothuaj të njëzëshme jashtë vetë Shteteve të Bashkuara të Amerikës. (Voal-online)