TRAGETI NË FLAKË, QINDRA UDHËTARË KËRKOJNË NDIHMË - MES TYRE 22 SHQIPTARË
E Djelë, 12.28.2014, 04:22pm (GMT+1)
 Qindra udhëtarë të dëshpëruar në një traget që po digjet pranë brigjeve të Greqisë po kërkojnë ndihmë, ndërkohë që ekipet e shpëtimit po përpiqen t'u vijnë në ndihmë duke u përballur me me erërat e forta dhe detin e trazuar.
Deri tani janë shpëtuar rreth 150 udhëtarë, nga 478 veta në bordin e tragetit Norman Atlantic. Shumë prej udhëtarëve po kërkojnë ndihmë me anë të telefonave celularë.
Sipas listës së publikuar të udhëtarëve, në traget ndodhen edhe 22 shqiptarë, por Ministria e Jashtme e Shqipërisë tha në një komunikatë se numri i tyre mund të jetë edhe më i madh për shkak të ndryshimit të emrit në pasaportë. Roja bregdetare shqiptare ka dërguar dy anije në vendin e ngjarjes dhe autoritetet e Shqipërisë thonë se janë në kontakt me ato greke dhe italiane.
Trageti ishte 80 kilometra në veriperëndim të Korfuzit kur dërgoi një sinjal rreziku pasi në kuvertën e poshtme të tij kishte shpërthyer zjarri.Trageti po udhëtonte nga Patrasi i Greqisë perëndimore për në qytetin lindor të Italisë, Ancona.
Nuk është e qartë nëse ka patur viktima apo nëse ka pasagjerë në ujë, ku temperaturat e ftohta të dimrit do ta bënin të vështirë shpëtimin.
Dhjetra udhëtarë janë transferuar në një anije ndërsa shumë të tjerë kanë arritur të hipin në varka shpëtimi.
Disa anije që lundronin në zonën e afërt detare shkuan me shpejtësi për në vendin e ngjarjes së bashku me helikopterë shpëtimi. Në mbështetje të operacioneve të shpëtimit merr pjesë edhe një avion kërkimi C-130.www.voal-online.ch
|
Comments (0)
Dërgoja shokut
Printo
