Doda: Qeveria mbron xhelatët e së kaluarës, do t'i drejtohemi NATO-s, PE-së dhe KiE-s

Drafti i Dosjeve

"Po i shmangen lustracionit, Meta ka bllokuar nismën e shoqërisë civile"

"Protektorët e krimit politik godasin edhe njëherë procesin e pastrimit të shtetit nga kriminelët"

"Theksimi i Kryeministrit për të mos trajtuar lustracionin, nxjerr qartazi qëllimin e futjes së një ligji paralel për dosjet"

"Do duhet që t'ia dërgojnë Parlamentit Europian dhe Këshillit të Europës mënyrën se si qeveritarët e sotëm i shmangen lustracionit"

"Të dhënat do ia dërgojmë NATO-s që ta dijë se ju punoni dhe drejtoni me sigurimsa e spiunë"

HERION MESI

Nismëtarja e draftit për hapjen e dosjeve të ish-Sigurimit të Shtetit, Mesila Doda, u shpreh kundër variantit të propozuar nga qeveria. Në një prononcim për mediat, deputetja demokrate akuzoi mazhorancën socialiste si protektore e krimit politik, e cila sipas saj, po godet edhe njëherë procesin e pastrimit të shtetit nga kriminelët. "Protektorët e krimit politik godasin edhe njëherë procesin e pastrimit të shtetit nga kriminelët. Në mbledhjen e sotme të Këshillit të Ministrave, u miratua dhe ligji i dosjeve i përgatitur me qëllimin e pastër për të mbrojtur krimin politik të djeshëm dhe për të hapur e rënduar vetëm ata që dikur u shtrënguan nga sistemi", u shpreh Doda. Për ligjvënësen e djathtë, projektligji i qeverisë nxjerr qartazi qëllimin e një ligji paralel dhe ndër të tjera ai mbron figurat e së kaluarës, të cilat janë në postet më të larta të piramidës shtetërore. "Ligji që u miratua sot dhe theksimi i Kryeministrit për të mos trajtuar lustracionin, pasi ky nuk ishte këndvështrimi i tij, nxjerr qartazi qëllimin e futjes së një ligji paralel për dosjet. Ligji për hapjen e dosjeve dhe lustracionin ka më se një muaj që është i depozituar në Parlament dhe ende nuk merret në konsideratë. Sot ndeshemi edhe me deklaratën e ministrit që në orvatjen për të amnistuar krimin politik, pjesë drejtuese e shtetit dhe partisë në pushtet, tashmë është bërë edhe Kryetar Parlamenti edhe kryetar i Gjykatës Kushtetuese, duke treguar edhe njëherë atë tendencë diktatoriale të kësaj qeverie për të uzurpuar çdo pushtet tjetër, atë të legjislativit dhe të drejtësisë", u shpreh ajo. Duke vijuar më tej, Doda i cilësoi të paqena deklaratat e ministrit të Mirëqenies Sociale dhe Rinisë, Erjon Veliajt, i cili sipas saj, e ka etiketuar projektligjin e propozuar një muaj më parë nga ajo dhe kreu i PDIU-së, Shpëtim Idrizi, si antikushtetues. Doda tha se Veliaj po thotë gjëra të paqena dhe se mund ta dërgojë në Komisionin e Venecias për verifikim. "Ligji që fle në protokollin e Parlamentit prej një muaji nuk ka asnjë element antikushtetues dhe ministri vetë është në dijeni dhe i ndërgjegjshëm se thelbi i shqyrtimit të lustracionit në këtë ligj është trajtimi, një për një i veprimtarisë së spiunëve, drejtuesve të Sigurimit të Shtetit dhe organeve të tjera të dhunës dhe të politikbërjes diktatoriale dhe jo dënim kolektiv siç po përpiqet të hedhë shashka, kryetari i ri i Gjykatës Kushtetuese, Veliaj", u shpreh Doda. Ndërkaq, deputetja e PD-së u bëri apel dhjetoristave t'i bashkohen kauzës së lustracionit dhe të vihen në lëvizje për t'i njohur dhe partnerët ndërkombëtarë jo vetëm me mënyrën se si po e trajton këtë çështje qeveria e sotme, por edhe për t'i prezantuar ata me spiunët e së kaluarës komuniste shqiptare. "Në këto kushte, grupi i shoqërisë civile dhe mbështetësit politikë të këtij ligji, Studentët e dhjetorit dhe deputetët mbështetës do duhet që t'ia dërgojnë Parlamentit Europian dhe Këshillit të Europës mënyrën se si qeveritarët e sotëm i shmangen lustracionit dhe se si vazhdojnë të qeverisin me punonjësit e sigurimit që dikur rekrutonin e drejtonin spiunët", apeloi Doda. Por deputetja demokrate do të shkonte dhe më tej në "kërcënimet" e saj, teksa paralajmëroi se të dhënat për ish-bashkëpunëtorët e ish-Sigurimit të Shtetit të asaj kohe do t'i dërgohen edhe Aleancës së Atlantikut të Veriut, ku bën pjesë dhe Shqipëria. "Të dhënat do ia dërgojmë NATO-s që ta dijë se ju punoni dhe drejtoni me sigurimsa e spiunë. Do t'i drejtohem me një apel gjithë deputetëve të Parlamentit të Shqipërisë, personalisht dhe një për një, veçanërisht atyre që janë pjesë e një sistemi që shembi komunizmin dhe që kanë të persekutuar e të vrarë në familjet e tyre dhe rrethin e tyre. U kërkoj t'i bashkohen një vetëdije të re politike për të mos mbrojtur kriminelët e djeshëm që sot vazhdojnë të jenë në majën e politikës qeveritare. Ligji që kërkon të shitet si risi, është vetëm një mënyrë për të shantazhuar spiunët e nivelit të ulët, por njëherazi të mbrojnë xhelatët dhe shefat e qeverisë dhe partisë", deklaroi ajo. Në përfundim të deklaratës së saj, deputetja demokrate u bëri sërish apel deputetëve, ish-aktivistë të "Lëvizjes së dhjetorit", si dhe ish të persekutuarve, që t'i bashkohen për të kërkuar largimin e xhelatëve nga piramida shtetërore. "I drejtohem shoqërisë civile, studentëve dhe veçanërisht të persekutuarve të mos lejojnë që xhelatët t'i trajtojnë si numra në dëmshpërblime dhe të tallen duke vazhduar të nderojnë e dekorojnë xhelatët e komunistët. Më së fundi, ju kujtoj se nuk mund të ketë spastrim të politikës nga krimi ordiner pa u spastruar njëherë e mirë nga krimi politik, i cili është rrënja e monstruoziteteve të djeshme e të sotme", u shpreh dje Mesila Doda në reagimin e saj pas miratimit nga qeveria të draftit për hapjen e dosjeve, që sipas Ekzekutivit, synon dhënien fund të shantazheve. Dhe për këtë arsye, qeveria në projektligjin e saj bën me dije se do të ngrihet Autoriteti për Informim Publik.

Drafti Doda-Idrizi

Projekti për hapjen e dosjeve të Sigurimit të Shtetit dhe procesin e lustracionit, i depozituar nga Doda dhe Idrizi rreth një muaj më parë, i mbështetur gjithashtu edhe nga shoqëria civile, përmban 36 nene gjithsej dhe parashikon që të vërë në dispozicion të personave dosjet e Sigurimit të Shtetit gjatë periudhës së regjimit komunist nga periudha 24.10.1944 deri më 31.03.1991. Drafti në fjalë parashikon një gamë të gjerë personalitetesh që do të verifikohen për pastërtinë e figurës së tyre duke filluar që nga Presidenti, te krerët e partive, apo dhe ambasadorë e drejtues të lartë institucionesh. Zbatimi i këtij ligji parashikohet të veprojë deri më 31 dhjetor të vitit 2030. Në nenin 17 të këtij drafti është përcaktuar se cilët janë funksionarët që nuk duhet të jenë më në poste drejtuese apo të zgjidhen si deputetë. Në draft janë futur dhe sekretarët e parë të rinisë të rretheve. Në këtë sanksionim pritet që të preken disa deputetë të PS-së. "Funksionarët publikë me mandat kushtetues dhe çdo person tjetër i zgjedhur nga Kuvendi janë subjekte të verifikimit sipas këtij ligji. Ata nuk e ndërpresin mandatin kushtetues apo detyrën ku janë zgjedhur, por të dhënat e grumbulluara nga verifikimi publikohen detyrimisht. Në çdo rast, një funksionar publik i tillë mund të dorëhiqet përpara përfundimit të mandatit të tij dhe në këtë rast dosja e tij nuk publikohet", thuhet në pikën dy të nenit 17.

2.   Funksionarët publikë me mandat kushtetues dhe çdo person tjetër i zgjedhur nga Kuvendi janë subjekte të verifikimit sipas këtij ligji. Ata nuk e ndërpresin mandatin kushtetues apo detyrën ku janë zgjedhur, por të dhënat e grumbulluara nga verifikimi publikohen detyrimisht. Në çdo rast, një funksionar publik i tillë mund të dorëhiqet përpara përfundimit të mandatit të tij dhe në këtë rast dosja e tij nuk publikohet.