VOAL - Online Zëri i Shqiptarëve - Editorial: Shqipëria do t'i ndihmojë çiltërsisht fqinjët për anëtarësim sa më të shpejtë në NATO

Voal-online Filozofia e njohur mijëravjeçare e shqiptarit se të mirën që e ke tek fqinji do ta kesh shumë shpejt në shtëpi, të keqen që e ke tek fqinji do ta kesh po ashtu, shumë shpejt në shtëpi, ka qenë dhe mbetet përcaktuese në përkushtimin e kombit tonë për të pasur marrëdhënie sa më të mira me fqinjët. Ndaj nuk është e rastit që Tirana, në praninë këtyre ditëve të Sekretarit të Përgjithshëm të NATO-s Jap De Hup Shefer, premtoi rol të fuqishëm për proces sa më të shpejtë anëtarësimi në këtë aleancë edhe të vendeve të tjera fqinje dhe të rajonit, si Maqedonisë, Kosovës, Malit të Zi, Bosnjës dhe Serbisë. Pranimi i Shqipërisë në NATO më herët se disa vende të tjera të të ashtuquajturit Ballkani Perëndimor, veç të tjerash, ishte një domosdoshmëri historike. Dhe e vërteton frutshmërinë e vizionit të Amerikës për të sotmen dhe të ardhmen e Evropës Juglindore në kuadrin e integrimeve rajonale, të kontinentit dhe atyre globale. Sepse është absolutisht e sigurtë që Shqipëria, në mënyrën më të çiltër, do t'i ndihmojë vendet e sapopërmendura për t'u integruar edhe ato, pa humbur kohë, në Aleancën e Atllantikut Verior. Ky rol i Shqipërisë dhe kombit shqiptar, të një mendësie tejet të emancipuar evropiane e perëndimore, në këtë kohë kaq vendimtare do të ketë ndikim të posaçëm në përhapjen dhe përparimin e kësaj mendësie në gjithë rajonin e Evropës Juglindore. Të jemi realisht të vetëdijshëm, miqtë tanë perëndimorë të jenë realisht të vetëdijshëm për vitalitetin, shpirtin krijues dhe konstruktiv që e karakterizon, si në të gjitha kohërat, kombin tonë. Tirana edhe këto ditë dëshmoi fare qartë se Perëndimi mund të mbështetet tek Shqipëria dhe tek shqiptarët për të pasur procese sa më pozitive në rajonin me histori tejet të veçantë marrëdhëniesh. Këtë besueshmëri pritet ta kenë edhe të gjithë fqinjët tanë, të cilët kanë pasur gjithmonë dhe do të kenë gjithmonë fqinj konstruktivë tek kombi ynë dhe tek Shqipëria. Dhe këtë fqinjët e kombit tona ta dëshmojnë me mendësi të re, me sjellje të reja dhe me krijim përvojash perëndimore në marrëdhëniet e reja me kombin tonë. Kjo është për të mirën e përbashkët dhe e mira e përbashkët është në favor të secilit prej kombeve në këtë pjesë të gadishullit, të kontinentit dhe të botës.