VOAL - Online Zëri i Shqiptarëve - Ditëlindja e Evropës së Bashkuar është më 9 maj 1950

Voal-online - Data 9 maj 1950 njihet si ditëlindja e Evropës së Bashkuar. Kështu është vendosur në takimin e kryetarëve të shteteve dhe të qeverive evropiane në Milano më 1985. Në këtë takim 9 maji u shpall Dita e Evropës. Pse pikërisht kjo datë? Zanafillën e kësaj përgjigjeje e gjejmë në periudhën menjëherë pas mbarimit të Luftës së Dytë Botërore. Ishin vitet kur fillonte Lufta e Ftohtë në një botë të raskapitur tashmë nga dy luftëra shkatërrimtare, në një botë të ndarë në dy blloqe ideologjikisht të kundërta dhe me rrezikun e rrëshqitjes në një tjetër konflikt planetar. Pikërisht në këtë moment ministri i Jashtëm francez Robert Schuman paraqet propozimin për të krijuar një Europë të organizuar. Propozimi, i njohur si "deklarata Schuman", është pranuar si hapi i parë drejt integrimit evropian. Evropa e Bashkuar, pra, lindi në frymën e kërkimit të paqes dhe të bashkëjetesës së qetë midis shteteve. Pra, lind me optikën e mbajtjes së marrëdhënieve të bashkëpunimit e të integrimit midis forcave që e përbëjnë. Rreshtat e parë të deklaratës japin idenë e qëllimeve ambicioze të saj.
"Paqja botërore nuk mund të shpëtohet pa iniciativa krijuese në lartësinë e rreziqeve që na kërcënojnë." "Duke i bërë të përbashkëta disa prodhime bazë dhe duke institucionalizuar një Autoritet të Lartë vendimet e të cilit të jenë të detyrueshme për Francën, Gjermaninë dhe për vendet e tjera që do të aderojnë, do të kemi realizuar themelet e para konkrete të një federate evropiane të pazëvendësueshme në mbrojtje të paqes." Kështu propozohej krijimi i një Institucioni evropian mbinacional, të cilit t'i besohet administrimi i dy lëndëve të para të cilat në atë kohë i ishin premisë e çdo force ushtarake, qymyri dhe çeliku. Për të kuptuar sot rolin revolucionar të këtij gjesti do të mjaftonte sot të përfytyronim një iniciativë të ngjashme midis Izraelit dhe palestinezëve, midis serbëve dhe boshnjakëve, midis popullsive tuci e hutu... Këto vlera u realizuan falë zhvillimit ekonomik e social dhe ekuilibrit të kontekstit ambiental e të rajoneve të ndryshme, të vetmit faktorë që mund të garantojnë një nivel të cilësisë së jetesës të shpërndarë barabar mes qytetarëve. Europa, si bashkësi e popujve të vetëdijshëm, me kultura të ngjashme apo përplotësuese, ekziston prej shekujsh, por pa rregulla dhe pa institucione. Vetëdija për këto vlera të përbashkëta themelore nuk kishte mjaftuar kurrë për të shmangur tragjeditë të cilat kishin përgjakur tokat e saj. Sot, ndërkaq, çdo vend që vendos në mënyrë demokratike të anëtarësohet në Bashkimin Evropian përshtat vlerat e paqes dhe të solidaritetit mbi të cilat lartësohet ndërtesa e përbashkët.