Voal-online - KANË, France (Reuters) - Woody Allen e kënaqi masën e adhuruesve të kinemasë në nisjen e Festivalit të Filmit në Kanë të mërkurën (sot) me filmin e ri "Midnight In Paris" (Mesnatë në Paris) ku Owen Wilson udhëton mbrapa në kohë dhe takohet me hijet e Ernest Hemingway dhe Pablo Picasso.
Qeshjet dhe duartrokitjet e shoqëruan shfaqjen e filmit në hapje të edicionit të sivjetëm të festivalit, i cili zgjat 11 ditë me radhë, në një luks të rrallë, me parada të artistëve në qilimin e kuq, konferenca shtypi, shetitje me jahte në det dhe mbrëmje festive në plazhin e famshëm të Rivierës së Kaltër Franceze.
Në "Midnight in Paris," Allen, një favorit në Kanë, i rreket idesë se kohët e shkuara janë më të mira se e sotmja, kështu që personazhi i luajtur nga Owen, Gil ëndërron për Parisin e vitit 1920, ndërkohë që piktori Paul Gauguin dëshiron kthimin në periudhën e Rilindjes.
Regjisori 75 vjeçar, fitues i çmimit Oskar, shkakton të qeshura tek e transporton Owen, një skenarist i Hollywoodit i quajtur Gil, në një Paris të populluar nga Hemingway, Gertrude Stein, Luis Bunuel, Salvador Dali dhe artistë të tjerë të mëdhenj të cilët ai i ka admiruar prej një kohe të gjatë.
Dhe në një pikë të caktuar ai takohet me personazhin e Bunuel dhe i kërkon që ai të bëjë një film për një mbrëmje pritjeje prej nga të ftuarit nuk mund të largohen, me çka i referohet qartë pikturës së tij të vitit 1962 "Zhdukja e Engjellit".
Zonja e parë franceze Carla Bruni ka një rol të vogël si rrëfyese në tri skena në një muzeum të sotëm. Megjithatë ajo pezulloi praninë e saj të planifikuar në Festivalin e Kanës "për arsye personale", duke i ushqyer zërat e mediave franceze se ajo mund të jetë shtatzënë.
Allen tha se ai u takua me Brunin kur ai u ftua për një mëngjes me presidentin francez Nicolas Sarkozy dhe e pyeti ish supermodelen nëse mund të kishte një rol të vogël në këtë film.
"Ajo tha se do t'i pëlqente të ishte në njërin nga filmat e mi, sepse do të kishte kënaqësinë t'iu tregonte nipave e mbesave të saj dikur se ajo kishte luajtur në filma," tha Allen. "Ajo u përfshi në film dhe e luajti rolin e sa mrekullisht... duke nxjerrë personazhin në mënyrë të përkryer."
Angelina Jolie, Brad Pitt, Sean Penn, Penelope Cruz, Robert De Niro, Mel Gibson dhe Johnny Depp pritet të shkelin në qilimin e kuq të Kanës, duke siguruar interesin e bujshëm të mediave dhe duke ndjellë turma të mëdha adhuruesish, të cilët duan të komunikojnë me idhujt e tyre.
Pedro Almodovar, Nanni Moretti, vëllezërit Dardenne, Aki Kaurismaki dhe Lars Von Trier synojnë të gjithë Palmën e Artë të Kanës (Palme d'Or) për filmin më të mirë.
Po kështu edhe veterani amerikan Terrence Malick, i kthyer me filmin e tij të pestë, i pritur me shumë etje në festival, "The Tree of Life" (Lisi i jetës) ku Pitt dhe Penn luajnë rolet kryesore në sagën e familjes, ngjarjet e së cilës janë vendosura në Amerikën Qendërperënduimore të viteve 1950./Elida Buçpapaj
(http://www.reuters.com)
Comments (0)
Dërgoja shokut
Printo
