ESPERANTOJA E TË DASHURUARVE Poezi nga VEHBI SKËNDERI
E Mërkurë, 10.16.2013, 07:42am (GMT+1)
Nuk ka pse të dish çdo gjuhë, me mijëra gjuhë, që flet Globi Për të komunikuar me një grua. Çdo dallëndyshe, fazankë, zog korbi, thëllëzë e fajkua Shprehet njëlloj: "Të dua!"
Dhe japonisht, hebraisht, arabisht. Dhe gjermanisht. Dhe latinisht. Dhe në çdo gjuhë tjetër, në të cilën asnjë libër e asnjë vjershë nuk u shkrua. Dashnorët shprehen po njësoj: "Të dua!"
I ndrijnë sytë tërë gas: francezes, anglezes, indianes e kilianes së hijshme kur buzëqesh: "Të dua!"
U qesh fytyra plot ndriçim, si aurora: balle, mjekra, gusha, llërë e duar. Kur çuçurit çdokush, qoftë edhe pa zë: "Të dua!"
Dhe gjithë arkitektura e gruas: gjoksi, supet, gjunj e vithe: Janë shkronja të këtij "alfabeti". Të kësaj Esperantoje. Të njëjtat shenja "pikësimi": presje, pikëpyetje e pikëçuditje. Të njëjtat hieroglife!
Dhe mund t'i lexojë me lehtësi: Edhe një Profesor Akademik, me tre Çmime Nobel Edhe një Kardinal: Tri Herë i Amëshuar Edhe një bari dhish i pashkolluar: belbaç e teveqel.
Ngjyrat, kodet, shenjat e dëshifruara e të padëshifruara të dashnorëve U ngjajnë sinjaleve të semaforëve: gjithnjë të mirëpritur e të MODËS. Që mund të kuptohen, dhe në Kozmos. -- Nga libri "Mirëmëngjesi Shqipëri", 2012
VEHBI SKËNDERI
|