VOAL - Online Zëri i Shqiptarëve - ASNJË HORIZONT NUK MË FTON MËNga QAZIM D. SHEHU

BURIMI

Vjen së largu imazh i thyer,
Një vijë e horizontit u shkërbye me një brinjë.
Si rrugë ku duhej të ecja
Drejt burimit tënd të fshehur.
Eca dhe eca dhe e gjeta atë burim,
Kur e gjeta ,piva etshëm , u ngopa,
E tani?Asnjë horizont nuk më fton më.
Ç`trishtim...

ZOGËZ RRITUR NË KAFAZ

Zogëz rritur në kafaz.Kafaz i ndryem.
Në atë çast kur të afrohet një pëshpërimë,
Hekurat shqyhen vetiu,
Dikush i la pa saldim...

BREGU

Dashuria ec drejt teje.
Ti prita i vë.
Si një lumi të rrëmbyer,
Për të ruajtur të mbjellat.
Lumi s`të dëgjon.
Pritat shpërthen.
Mbytesh në të ,
Një breg të ri gjen...

EMBLEMË

Të gjithë ne kemi nevojë për një emblemë.
Na e vodhën mbretërit.
Pa emblemë s`dimë ku vemë,
Piketat na i hoqën etërit...

SADO

Sado të rrotullohen ditët,
Portreti jot mbetet i njenjtë.
Je e zonja t`i mbushësh greminat
Me atë që të do vërtet..
Sado fjalët e mia nuk thonë,
Të vërtetën që duhej të ish,
Greminat brenda teje gjëmojnë
Në ikjen tënde të trishtë...

I LIGU

Brenda fjalës së mirë punon i ligu,
E ëmbëlson atë si karamele.
Në sytë e tij gjysmë të fikur,
Merr stuhi një dredhëz ere...

FILLIMI

Dashuritë gjithnjë mbeten përgjysmë,
Ndryshe nga e para s`do t`ua fillonim,
Edhe një përkryerje fjale mbetet përgjysmë,
Edhe një aventurë pa Don Kishotin.
Mos ndodhte kështu si do ia fillonim,
Të dashuronim, të flisnim, të kërkonim,
Plotërinë e çastit paranonjak,
I cili s`vjen asnjëherë,
Për të ruajtur përgjysmimin plot vlerë...