Në Afganistan përfundojnë zgjedhjet presidenciale
E Enjte, 08.20.2009, 08:43pm (GMT+1)
Në Afganistan përfunduan zgjedhjet presidenciale, të cilat zyrtarët po i cilësojnë si sukses. Por nuk është ende e qartë se sa vetë morën pjesë dhe ka shumë pretendime për parregullsi.
Zyrtarët afganë thanë se akte sporadike dhune lanë të vrarë të paktën 26 vetë në të gjithë vendin. Ndër të vrarët ka 9 civilë, 9 policë dhe 8 ushtarë afganë. Sulme ka pasur në Kabul, Kandahar dhe qytete të tjera të rëndësishme. Por zyrtarët e Natos thanë se në analizë të përgjithshme, zgjedhjet ishin sukses për sa i përket sigurisë.
Punonjësit e zgjedhjeve po numërojnë tani votat dhe pritet që rezultati përfundimtar të mos bëhet i ditur edhe për disa ditë. Në Kabul dhe Afganistanin verior votimet u zhvilluan me ritme normale gjatë gjithë ditës. Në jug dhe lindje ku kishte më shumë shqetësime për sulme talebane, pati njoftime për pjesëmarrje të ulët në votime. Pjesëmarrja e ulët mund të dëmtojë kredibilitetin e zgjedhjeve dhe të minojë mbështetjen për fituesin.
www.voal-online.ch
|