|
BAJRAMAJ NDIHMON ZHVILLIMIN E FUTBOLLIT TË FEMRAVE NË KOSOVË
E Martë, 05.10.2011, 07:42am (GMT+1)
Fatmire Bajramajn e presin dy sfida të mëdha në dy muajt e ardhshëm. Futbollistja kosovare më 26 maj do të luajë për Potsdamin në finale të Ligës së Kampionëve. Ndërsa nga 26 qershori do të luajë për Gjermaninë në kampionatin botëror që mbahet pikërisht në këtë vend. Por, finalja e Ligës së Kampionëve dhe kampionati botëror nuk janë sfidat e vetme për të cilat mendon Bajramaj. Ajo është duke shqyrtuar edhe mundësitë se si mund të kontribuojë në zhvillimin e futbollit të femrave në Kosovë. Bajramaj 23-vjeçare kohë më parë firmosi kontratë trevjeçare me ekipin gjerman Frankfurt. Këtij ekipi do t'i bashkohet pas përfundimit të botërorit. Në një intervistë për gazetën, futbollistja kosovare ka thënë se nga skuadra Potsdam dëshiron të largohet me trofeun e Ligës së Kampionëve. Me Potsdamin këtë edicion Bajramaj ka fituar Bundesligën e Gjermanisë, ndërsa vitin e kaluar fitoi kampionatin gjerman dhe Ligën e Kampionëve. Bajramaj vitin e kaluar u shpall futbollistja e tretë më e mirë në botë, ndërsa pritet të jetë yll i botërorit që nis në fund të qershorit.
(http://www.koha.net) www.voal-online.ch
|
Comments (0)
Dërgoja shokut
Printo
