Me zemërim pedagogja Nivedita Prasad shikon në posterat e NPD-së (partia
nacional-demokrate gjermane, parti radikale e djathtë). "Më mirë paratë
për gjyshen se për romët", shkruan në të. Partia ekstremiste e djathtë
ka vendosur parullat e saj kudo në shtyllat elektrike nëpër rrugë. Edhe
pëgjatë rrugës që përmes lagjes me ndërtesa të mëdha Berlin Hellersdorf
të çon në Shtëpinë e Refugjatëve. "E shihni se çfarë klime mbizotëron
këtu", shprehet e mërzitur Prasad. Kundër atmosferës armiqësore në këtë
pjesë të kryeqytetit duhet të kishte ndërmarrë diçka Universiteti
Alice-Salomon. Prandaj, nga vjeshta e kaluar në strehimoren e
refugjatëve janë organizuar seminare të ndryshme.
Sipas statistikave të fundit, numri i azilkërkuesve në Gjermani është
rritur me rreth 80 për qind nga viti i kaluar. Kjo është veçanërisht një
sfidë e madhe për punën sociale. Refugjatët duhet të integrohen më mirë
në qytete për të shmangur tensionet sociale. Për këtë, punonjësitë
socialë duhet të punojnë së bashku me autoritete të ndryshme gjermane
dhe ta njohin ligjin e komplikuar gjerman të azilit dhe të drejtës
sociale. Universitetet gjermane tani duan të përgatisin më mirë
studentët e tyre. Afërsia e drejtpërdrejtë me azilkërkuesit mund të jetë
vetëm e dobishme për ata.
Mësimi nga njëri-tjetri
""Mundësitë dhe kufizimet e punës sociale në kontekstin e
politikës restriktive të azilit", quhet seminari që aktualisht Nivedita
Prasad mban në shtëpinë e refugjatëve në Berlin. Sigurisht që në kurs
janë të mirëpritur edhe banorët. Megjithatë këtë ofertë e shfrytëzojnë
vetëm pak prej tyre. "Njerëzit këtu natyrisht që kanë probleme të tjera
më të rëndësishme", thotë Prasad. Prandaj, në kuadër të kursit kemi një
shkëmbim shumë të gjallë të përvojave. Kjo për faktin se shumë prej
studentëve kanë vetë sfondin e migrantit, ata sjellin me vete një
shumëllojshmëri të aftësive gjuhësore. Disa prej tyre mund të
komunikojnë rrjedhshëm në gjuhën turke, ruse ose arabe me refugjatët.
Në këtë mënyrë dalëngadalë janë krijuar kontakte intensive që janë në të
mirë të të gjithëve. "Ne mësojmë këtu shumë gjëra, se si janë kushtet e
jetesës dhe të drejtat e refugjatëve", shpjegon Susanne. Studentët
mësojnë, për shembull, se kush ka të drejtë që në në bazë të Konventës
së Gjenevës të kërkojë azil dhe që njerëzit që u pranohet e drejta e
refugjatit kanë të drejtë që pas tre muajsh të sjellin në Gjermani edhe
familjen e tyre.
Situata e azilkërkuesve ka ndikuar tek Susanne që ajo tani të angazhohet
në Inisiativën studentore "Heqja e kufijve". Anëtarët e kësaj
inisiative shoqërojnë refugjatët tek autoritetet gjermane, organizojnë
turne të përbashkëta të futbollit ose takohen me banorët e shtëpisë së
refugjatëve për bisedë dhe kafe.
Shpresa për kthim në atdhe
Por nuk janë vetëm studentët ata që mësojnë në mjedisin e pazakontë.
"Unë gjithashtu gjithmonë korigjojë paragjykimet e mia", thotë Nivedita
Prasad. Ajo është impresionuar për shembull nga një bashkëbisedim me
banorët, në të cilin temë ishin dëshirat e tyre. Shumica e tyre thoshin
se ata shpresojnë për paqe dhe kthimin në atdheun e tyre. "Unë nuk e
kisha pritur kurrë një gjë të tillë", e pranon profesoresha Prasad.
Në semestrin e fundit, 300 studentë kanë marrë pjesë në seminaret e
Universitetit Alice- Salomon të organizuara në strehimoren e
refugjatëve. Ideja e mirë është përhapur shpejt. Ndërkohë, ka edhe
institucione të tjera arsimore të cilat mbajnë mësim në kampet e
refugjatëve në vende të tjera në Gjermani.dw
Comments (0)
Dërgoja shokut
Printo
