Voal-online -NEW YORK (Reuters) - Një zëdhënëse e këngëtares Madonna tha të martën (dje) se as Madonna, as shoqaa bamirëse që ajo financon në Malawi (Afrikë) nuk po hetohet nga FBI.
Disa njoftime të fundit të mediave thoshin se një shoqatë ndërkombëtare bamirëse arsimore, të cilën këngëtarja e financon, Success for Kids (Sukses për Fëmijët), është nën hetime nga agjentët e FBI në Los Anxhelos lidhur me parregullsi të mundshme dhe aktivitet të dyshimtë.
Raportet janë në vijim të lajmit të muajit të shkuar se një tjetër shoqatë bamirëse e financuar nga Madonna, Raising Malawi (Ndërtimi i Malavit), kishte hequr dorë nga një plan për të ndërtuar një shkollë për vajzat e varfëra të Malawit për shkak të keqmenaxhimit. Bordi i shoqatës bamirëse u shkarkua.
"Ditët e fundit një numër thashethemesh krejtësisht të rreme rreth filantropisë së Madonnas - përhapur nga blogerët dhe tabloidët - kanë filluar të publikohen në Internet," tha zëdhënësja e Madonnas, Liz Rosenberg, në një deklaratë.
"As Madonna, as Raising Malawi nuk janë nën hetime nga FBI apo IRS (autoriteti i taksave i SHBA). Është fatkeqësi që njerëzit kanë vendosur të thonë për Raising Malawi dhe Madonna gjëra të pavërteta."
Rosenberg tha se këngëtarja "mbetet e përkushtuar dhe e përqëndruar në gjithçka që duhet për t'i ndihmuar fëmijët në Malawi".
Ajo nuk iu përgjigj menjëherë një pyetjeje që kërkon komente për shoqatën
Success for Kids. Uebsajti i shoqatës thotë se Madonna është kryetare e Bordit të Drejtorëve./Elida Buçpapaj