Publikuar: Sot, më 23 maj 2011

Prishtinë, 23 maj Komuna e Prishtinës ka ndërmarrë masat urgjente me ç'rast ka aktivizuar Shtabin Komunal për Mbrojtje dhe Shpëtim i cili është duke menaxhuar situatën e krijuar, pas të reshurave të së dielës me ku janë vërshuar shtëpi në disa lagje dhe fshatra të kryeqytetit, thuhet në një komunikatë të KK të Prishtinës.
Në fshatin Shkabaj, ekipet e komunës kanë bërë pastrimin e kanalit para kolektorëve si dhe është bërë pastrimi i rrugës. Në këtë fshat janë dëmtuar 26 shtëpi, një objekt i zdrukthëtarisë si dhe një trafo e KEK-ut e cila aktualisht është jashtë funksionit.
Në rrugën "Ibrahim Fehmiu" të lagjes Kodra e Trimave, ekipet e komunës së bashku me ato të ndërmarrjeve komunale "Hortikultura" e "Pastrimi" janë duke bërë pastrimin e pusetave dhe kanalizimit. Në këtë rrugë 7 shtëpi janë prekur nga vërshimet. Ekipet e komunës janë duke punuar edhe në hapjen e kolektorëve në afërsi të shkollës fillore "Hilmi Rakovica".
Ndërkaq në lagjen Mati 1 rruga "Malush Kosova" ekipet e komunës kanë bërë pastrimin e pusetave dhe kanalizimit.
Në këtë rrugë nga reshjet janë shkaktuar dëme materiale në një shtëpi dhe një lokal afarist.
Në fshatin Hajvali nga reshjet e djeshme janë vërshuar 20 shtëpi. Gjatë ditës së hënë edhe në këtë fshat është ndërhyrë në pastrimin dhe hapjen e pusetave.
Të gjitha ekipet emergjente të komunës së Prishtinës janë duke punuar në teren për t'u dalë në ndihmë lagjeve që janë përfshirë nga vërshimet, me qëllim të
parandalimit të rreziqeve dhe dëmeve tjera nga reshjet që po vazhdojnë.
Komuna e Prishtinës gjithashtu ka krijuar 3 grupe të komisionit për vlerësimin e dëmeve të shkaktuara nga reshjet. Anëtarët e këtij komisioni janë duke bërë vlerësimet në lagjet dhe fshatrat e prekura nga vërshimet.

(http://www.koha.net)

Rating (Votes: )

Comments (0)

Dërgoja shokut

Printo

---