TIRANË - Isa Boletini ishte një udhëheqës i mirë, i zgjuar dhe humanist i madh,
i cili donte vetëm lirinë e tokave shqiptare. Luftëtarët e tij nuk urrenin
popujt e tjerë, thjesht, ata dëshironin lirinë për popullin e vet". Ky ka qenë
Isa Boletini për humanisten angleze, Edit Durham, ndërsa për ne, është një
hero, mjerisht i pavarr.
I vrarë pabesisht nga malazezët në Podgoricë në janar të vitit 1916, Isa
Boletini do të varrosej po në atë qytet. Arkëmorti me eshtrat e tij do të
prehej për më shumë së gjashtë dekada në kryeqytetin malazez ku edhe u shua,
derisa në vitin 1977 ai do të zhvarrosej në fshehtësi. E megjithëse kanë kaluar
kaq vite, ai ende sot nuk është varrosur. Eshtrat ruhen nga hoxha i Mitrovicës.
Në Arkivin e Shtetit Shqiptar, ruhen disa dokumente të rëndësishme, që hedhin
dritë mbi përpjekjet e shtetit shqiptar për ti marrë ato eshtra në Tiranë. Ne
kemi mundur të sigurojmë disa prej tyre. Qeveria shqiptare e vitit 1923, me në
krye Ahmet Zogun kryeministër, ka bërë përçapje për t'i tërhequr "˜të mbetunat'
e atdhetarit nga Podgorica. Janë tri letra që hedhin dritë mbi këtë përpjekje,
që siç koha ka treguar, ka qenë e dështuar. Letra e parë, mban datën 19 qershor
1923. Mban firmën e prefektit të Shkodrës, por emri i tij është i
padeshifrueshëm. Në të ai shkruan që "për nderim të dëshmorëve Çerçis-Topulli,
Mustafa Qulli, Is Pulatini me të birët, të cilët për lirinë e pa-mvarësin e
atdheut, banë fli jetën e tyne... lutemi të bani hapat e nevojshëm pranë
Legatës Jugosllave qi të mundemi me çue nji deputacion për marrjen e eshtnave
të tyne". Siç shihet, dëshira e tij ka qenë kthimi i eshtrave në Shqipëri dhe
përgatitja e një varri të hijshëm për ta. Letërkëmbimi mes prefekturës së
Shkodrës dhe Ministrisë së Jashtme të kohës që drejtohej nga Pandeli Evagjeli,
kanë vazhduar disa muaj, por disa prej faksimileve nuk kemi arritur t'i
sigurojmë. Megjithatë, ka edhe një letër që tregon ndërhyrjen e drejtpërdrejtë
të kryeministrit Ahmet Zogu, disa muaj më vonë. Letra mban datën 15 dhjetor
1923 dhe në të shkruhet se "në përgjigje të shkresës suaj, këtu bashkuer kemi
nderin t'ju dërgojmë kopjen e shkresës së Legatës sonë në Beligrad që bën fjalë
mbi eshtrat e të ndjerit Isa Buletini me shokë". Letra mbyllet me kaq, vula
është e padeshifrueshme, ndërsa në fund është firma e Ahmet Zogut. E siç thotë
Zogu, bashkangjitur është edhe përgjigja e legatës shqiptare në Beograd që
zbulon se kjo kërkesë e shqiptarëve, nuk është pritur aspak mirë. Isa Boletini,
nuk kishte qenë mik i tyre, përkundrazi, ishte vrarë prej tyre. Kështu, sipas
letrës së Legatës sonë, që mban firmën e Ali Kolonjës, zyrtarisht, eshtrat
s'mund të merren, aq më tepër me ndërhyrjen e shtetit. "Në Ministeri të Punëve
të Jashtme këtu më deklaruan, se nuku munt të pranojnë asnjë lloj intervenie
zyrtare time për autorizimin e të vajturit të një delegacioni zyrtar shqiptar
në Podgoricë, për të ngritur eshtrat e e Isa Bulatinit", -shkruan Ali Kolonja.
Sipas tij, në fjalimin miqësor që ai ka pasur me ndihmësin e ministrit të
Punëve të Jashtme Jugosllave, ky i fundit i ka lënë të kuptojë, se po të
kërkohet një gjë e tillë nga ana e djalit të Isa Boletinit, që banon në
Shqipëri, eshtrat edhe mund të merren. "Me anën e qeverisë shqipëtare, është e
pandehur të jepet leje për transportimin të eshtrave nga Mali Zi, me të quajtur
këtë, vetëm me formën familiare dhe jo të marë kurrë një ngjyrë zyrtare",
-thekson ai. Për fat të keq, mungojë letrat e para, por edhe të fundit, për të
ditur saktësisht se pse nuk u arrit marrja e eshtrave që në vitin 1920. Asgjë,
por vetëm ngushëllues është fakti që së paku qeveria e kohës ka kërkuar t'i
kthejë eshtrat e firmëtarit të Pavarësisë dhe se me këtë çështje është marrë
vetë Zogu. Pavarësisht kritikave ndaj Zogut, si figurë komplekse, në këtë pikë
ai duhet vlerësuar. Sot, 96 vite nga vdekja e Isa Boletinit, ndonëse jemi në
100-vjetorin e Pavarësisë, as qeveria e shtetit të Shqipërisë e as qeveria e
shtetit të Kosovës, pra as sot kur shqiptarët kanë dy qeveri dhe dy shtete, nuk
po arrijnë t'i sigurojnë një varr heroit. Dy qeveri, dy shtete dhe asgjë.
Arsyet e kësaj në Kosovë citohen të jenë të ndryshme. Më së shumti faji iu
lihet sërish serbëve, sepse fshati Boletin në afërsi të Mitrovicës i përket
zonës problematike. Por, faji në fakt sido që të jetë është i shqiptarëve,
sepse Isa Boletini nuk është heroi i serbëve, është heroi i shqiptarëve; ai nuk
luftoi për serbët, por kundra tyre dhe për shqiptarët, ndaj borxhin për një
varr ia kanë shqiptarët e jo serbët.
Letrat
Po zbardhim më poshtë të plotë, tekstin e dy letrave.
Letra e parë, prefektura e Shkodrës, i shkruan Tiranës.
Shkodër, më 19. VI. 1923
PREFEKTURA E SHKODRES
Ministris Punëve Mbrendshme
Tiranë
Si për nderim të dëshmorëve Çerkis-Topulli, Mustafa Qulli, Is Pulatini me të
birët, të cilët për lirinë e pa-mvarësin e atdheut, banë fli jetën e tyne,
ashtu edhe për një kujtim të çmueshëm historik ndër sy të huejvet e ma tepër
për një mësim moral të popullit t'onë në mënyrë qi ndjenjat atdhetare të tijat
të rriten e të naltësohen, shofim t'arsyeshme e të nevojshme mbledhjen e eshtnave
të tyne të shpërndame andej e këndej, tuj i mbledh tok në nji vend e tuj i shti
së bashkut në nji vorr, i cili të goditet me nji përmendore të hijshme.
Meqënëse ndër të sipërpërmenunit dëshmorë, Is Pulatini me të birtë, i ka dhanë
fund jetës së tij në Podgoricë, lutemi të bani hapat e nevojshëm pranë Legatës
Jugosllave qi të mundemi me çue nji deputacion për marrjen e eshtnave të tyne,
të cilat me ndihmë të atdhetarëvet do ti gadisim një vorr të hijshëm.
Prefekti
(Firma dhe Vula)
Letra e dytë
Ambasada e kohës në Beograd i shkruan Tiranës.
Legation D'Albanie
NR. 1329/I
Beligrad, më 24 Nëntor 1923
Shkurtim
Mbi eshtrat e Isa Boletinit me shokë
Shkëlqesi,
Si përgjigje për në letrën tuej NR. A/X/2062/1, me datë 24 tetor 1923, kem
nderin tju bëj me dije, që në Ministeri të Punëve të Jashtme këtu më deklaruan,
se nuku munt të pranojnë asnjë lloj intervenie zyrtare time për autorizimin e
të vajturit të një delegacioni zyrtar shqiptar në Podgoricë për të ngritur
eshtrat e e Isa Bulatinit, s'andejmi për në Shkodrë, tue patur parasysh se mos
me kësi mënyre, goditet amour-propre i Malëzesve, dhe pastaj provokohet ndonjë
manifestacion, kur dihet që ata vjetët e fundit ndodheshin në armiqësi të madhe
me të ndjerin.
Po, në fjalimin miqësor që pata me ndihmësin e Ministrit të P. Jashtme, më la
të kuptoj, që po të lypet një kërkim i tillë nga ana e djalit të Isa Boletinit,
që banon në Shqipëri, me anën e qeverisë shqipëtare, është e pandehur të jepet
leje për transportimin të eshtrave nga Mali Zi, me të quajtur këtë, vetëm me
formën familiare dhe jo të marë kurrë një ngjyrë zyrtare.
Pranoni, Shkëlqësie, bashkë me të falat dhe nderimet te përzemërta.
(Nga)
Ministër Fuqiplotë
Ali Kolonja (d.v.)
(Për )
Shkëlqësis së Tij
Zotit Pandeli Evangjeli
Ministër i Punëve të Jashtme
Në Tiranë