I dërguari i posaçëm amerikan për Afganistanin dhe Pakistanin, Richard Holbrooke tha se Shtetet e Bashkuara do të paraqesin këtë javë planin e tranzicionit për Afganistanin në takimin e nivelit të lartë të NATO-s në Lisbon.
Sipas agjencisë franceze të lajmeve, zoti Holbrooke shprehu besimin se takimi në kryeqytetin e Portugalisë do të shënojë një "pikë kthesë" në politikat amerikane në Afganistan.
Zoti Holbrooke theksoi se misioni ushtarak amerikan do të përfundojë deri në vitin 2014, por tërheqja e trupave do të fillojë në korrik të vitit të ardhshëm.
Ndërkohë, një mosmarrëveshje e hapur mes presidentit afgan dhe komandantit të forcave amerikane dhe atyre të NATO-s në Afganistan është njoftuar në gazetën amerikane The Washington Post. Gazeta shkruan se gjenerali David Petraeus ka shprehur "habi dhe pakënaqësi" rreth komenteve që Presidenti Hamid Karzai bëri të shtunën për të njëjtën gazetë amerikane.
Zoti Karzai tha për The Washington Postin se ai do që Shtetet e Bashkuara të jenë më pak të dukshme dhe të ulin intensitetin e operacioneve ushtarake në Afganistan. Presidenti afgan kërkoi gjithashtu që trupat amerikane të ndalojnë sulmet gjatë natës, të cilat shkaktojnë pakënaqësi tek popullsia afgane, madje mund të nxisin disa njerëz të bashkohen me kryengritësit talebanë.
(http://www.voanews.com/albanian)