VOAL - Online Zëri i Shqiptarëve - ISA MUSTAFA

Kryetari i LDK-së, Isa Mustafa, sërish ka shkruar në faqen e tij të rrjetit social Facebook.

Kësaj radhe, ai ka folur në lidhje me marrëveshjen e 10 qershorit në mes të tri partive LDK, AAK dhe Nisma për Kosovën, në bashkëpunim me Lëvizjen Vetëvendosje.

"Të gjithë ne kemi subjektivitetin tonë dhe parimet dhe politikat bazë partiake, prandaj kushtet e veçanta nuk funksionojnë në një marrëveshje të ndërtuar pa kushte", ka thënë Mustafa duke iu referuar marrëveshjes me bllokun.

Në vijim ju sjellim të plotë reagimin e tij:

Një marrëveshjeje pa kushte nuk i përgjigjet një marrëveshje me kushte.
Më 10 qershor të këtij viti nënshkruam marrëveshjen LDK, AAK dhe Nisma për të ofruar një alternativë tjetër qeverisëse; zhvillim ekonomik, shtet ligjor, luftë kundër korrupsionit dhe krimit të organizuar, partneritet ndërkombëtar. Bashkuam 30 deputetë të LDK-së, 11 të AAK-së dhe 6 të Nismës, formuam grupin parlamentar prej 47 deputetëve. Si kurrë më parë, biseduam bashkërisht e edhe me Lëvizjen Vetëvendosje për të gjetur rrugë dhe forma bashkëpunimi në të ardhmen. Biseduam dhe po bisedojmë edhe me deputetët e komuniteteve jo shumicë dhe kemi bashkëpunim dhe mirëkuptim. Konsideruam dhe konsiderojmë se është në interes të vendit të bashkëpunojmë, pa marrë para sysh se a gjenden modalitete për të qeverisur bashkë, apo për të realizuar synimet e përbashkëta. Të gjithë ne kemi subjektivitetin tonë dhe parimet dhe politikat bazë partiake, prandaj kushtet e veçanta nuk funksionojnë në një marrëveshje të ndërtuar pa kushte. Nuk funksionojnë edhe nga fakti i fuqisë politike të determinuar me numrin e deputetëve dhe me votat e fituara nga këto zgjedhje. LDK si subjekt më i madh nuk vuri kushte dhe ne nuk dëshirojmë të pranojmë kushte. Kushti i vetëm është të punojmë për të mirën e vendit.